Үер ус, цаг уурын аюулт үзэгдлийн үед ажиллах шуурхай ажлын хэсэг хоёр дахь хурлаа зохион байгууллаа.

Ус, цаг уур орчны шинжилгээний газраас ирүүлсэн мэдээллийн дагуу ирэх зургадугаар сарын 27, 28-ны өдрүүдэд үргэлжилсэн аадар бороо орно гэсэн урьдчилсан төлөвийн дагуу болзошгүй үерийн гамшгийн үед ажиллах хүн хүч, техник хэрэгслийн бэлэн байдлын талаар мэргэжлийн байгууллагууд /Геодези усны барилга байгууламжийн газар, Хот тохижилтын газар, Улаанбаатар зам засвар арчлалтын газар, Ус сувгийн удирдах газар, Нийслэлийн Онцгой байдлын газар/ танилцуулга хийв.

Мөн өнгөрөгч 15, 16-ний өдрүүдэд шуурч үргэлжилсэн бороо орсны улмаас гарсан цахилгааны саатал, цаашид бороо салхины улмаас цахилгаан шугам сүлжээний найдвартай ажиллагааг хангах чиглэлээр зохион байгуулж байгаа ажлын талаар УБЦТС ТӨХК-аас мэдээлэл хийлээ. Хурлын төгсгөлд ажлын хэсгийн ахлагч Хотын Ерөнхий менежер Т.Гантөмөр мэргэжлийн байгууллагуудад үргэлжилсэн борооны улмаас хүндрэл үүсдэг 10 байршилд хүн хүч, техник хэрэгслийг бэлэн байлгаж ээлжийн дагуу шуурхай ажиллах, хоорондын уялдаа холбоог хангаж ажиллахыг үүрэг болголоо.