НҮБ-ын Төрийн албаны чуулга уулзалт энэ сарын 24-нөөс 26-ны өдрүүдэд Бүгд Найрамдах Азербайжан Улсын нийслэл Баку хотод зохион байгуулагдаж байна.

Энэхүү чуулга уулзалтад Монгол Улсын Төрийн албаны зөвлөлийн гишүүн Б.Идэрчулуун, Б.Баатарсайхан нар тэргүүлсэн төлөөлөгчийн хамт Баку хотод ажиллаж байна.

Тус чуулга уулзалтыг нээж БНАУ-ын тэргүүн дэд ерөнхийлөгч хатагтай Мехрабан Алиев болон НҮБ-ын Эдийн засаг, нийгмийн асуудал эрхэлсэн Ерөнхий нарийн бичгийн даргын орлогч ноён Лю Жен Мин нар үг хэлэв.

НҮБ-ын Ерөнхий ассамблейн 2003 оны 57 дугаар хуралдааны тогтоолоор жил бүрийн зургадугаар сарын 23-ны өдрийг НҮБ-ын Төрийн албаны өдөр болгож, гишүүн орнуудаас энэ өдрийг тохиолдуулан хөгжлийн үйл явцад төрийн албаны оруулах хувь нэмрийг онцгойлон авч үзсэн тодорхой арга хэмжээнүүдийг зохион байгуулж байхыг уриалсан байдаг.

Энэ удаагийн Төрийн албаны чуулга уулзалт нь “Үйлчилгээг  үр дүнтэй хүргэх, шинэлэг өөрчлөлт, хариуцлагатай институцээр дамжуулан тогтвортой хөгжлийн зорилтуудыг биелүүлэх нь” сэдвийн дор зохиогдож байна.

Мөн есөн дэд сэдвийн хүрээнд салбар хуралдаан болж буй бөгөөд Монгол Улсын Төрийн албаны зөвлөлийн гишүүд, төлөөлөгчид “Төрийн албан хаагчдыг сургах, хөгжүүлэх”, “Тогтвортой хөгжил-2030 хөтөлбөрийг хэрэгжүүлэхэд төрийн албан хаагчдын оролцоо” салбар хуралдаануудад оролцож байна.

Айлчлалын үеэр Монгол Улсын Төрийн албаны зөвлөлийн гишүүд, төлөөлөгчид Бүгд Найрамдах Азербайжан Улсын Онцгой байдлын яамны Бүсийн төвүүд, төслийн менежмент, боловсрол хариуцсан хэлтэсийн гүйцэтгэх захирал ноён Гүндүз Хмзаев болон тус улсын Үндэсний Академийн Шинжлэх Ухаан Технологийн сургуулийн Удирдах зөвлөлийн гишүүдтэй уулзалт хийгээд байна.

Чуулга уулзалтын үйл ажиллагаа үргэлжилж байна.