АТГ-аас энэ оны хоёрдугаар сард Дээд шүүхийн шүүгч Ч.Хосбаяр, Ц.Амарсайхан, Д.Мөнхтуяа, Захиргааны хэргийн давж заалдах шатны шүүхийн шүүгч Э.Халиунбаяр, Нийслэлийн захиргааны хэргийн анхан шатны шүүхийн шүүгч С.Төмөрбат, Баянгол дүүргийн Иргэний хэргийн анхан шатны шүүхийн шүүгч Н.Хангал нарыг үндэслэлгүй хөрөнгөжсөн гэдэг хэргээр шалгаж эхэлсэн билээ. Хэрэг прокурорын шатанд шилжих тэр үед “Хэрэг үүсгэх шаардлагагүй, хангалттай нотлох баримтгүй” гэсэн шалтгаанаар буцаагдсан байдаг.

Гэвч эл хэргийг хууль хяналтынхан бүр орхигдуулаагүй, шалгаж байгааг нотолсон нэгэн хэрэг өнгөрсөн сарын 26-нд болсон юм. Тодруулбал Ерөнхийлөгч Х.Баттулга зарлиг гаргаж нэр бүхий 17 шүүгчийг түдгэлзүүлсэн юм. Хэдий Ерөнхийлөгчийн зарлигаар түдгэлзүүлсэн ч дээрх шүүгч нар ажлаа үргэлжлүүлэн "хийсээр" байгаа. Тэгвэл эдгээрийн дунд АТГ-ын мөрдөн шалгах хэлстийн хараанд өртсөн зургаан шүүгчээс гурвынх нь нэр багтсан байна. Нэг ёсондоо үндэслэлгүй хөрөнгөжсөн гэх хардлагад өртсөн Нийслэлийн захиргааны хэргийн анхан шатны шүүхийн шүүгч С.Төмөрбат, Улсын дээд шүүхийн шүүгч Ц.Амарсайхан, Захиргааны хэргийн давж заалдах шатны шүүхийн шүүгч Э.Халиунбаяр нарын нэрс орсон нь анхаарал татна.

Тиймээс түдгэлзүүлсэн 17 шүүгчийн хэн, хэр их хэмжээний хөрөнгөтэй бэ гэдгийг АТГ-д мэдүүлсэн ХОМ-ээс танилцуулъя.

1. Б.Цолмонбаатар-Сонгинохайрхан дүүргийн Иргэний хэргийн анхан шатны шүүхийн шүүгч, Ерөнхий шүүгч

Тэрбээр 2017 онд 35.7 сая төгрөгийн орлоготой байсан бол 2018 онд 41.3 сая төгрөг өссөн байна. Харин гэр бүлийн орлого нь 15.9 саяас 9.4 сая төгрөг буурсан байна.

Түүнчлэн 249.9 сая төгрөгийн нэг орон сууцтай, 24 сая төгрөгийн Toyota, Crown автомашинтай, 4.5 сая төгрөгийн үнэт эдлэлтэй бол хадгаламж, картын үлдэгдэл нь 10.4 сая төгрөг.

Мөн бусдаас 10 сая төгрөгийн авлагатай бол 171.9 сая төгрөгийн зээлтэй.

2. Э.Халиунбаяр-Захиргааны хэргийн Давж заалдах шатны шүүгч

2017 онд өөрийн 38 сая бол 2018 онд 39.2 сая болж өссөн. Харин гэр бүлийнх нь орлого 20.7 саяас 19.4 сая болж буурсан байна.

Нийтийн орон сууц гурав байсан бол хоёр болж цөөрсөн бол хашаа байшин, авто граж тус бүр нэг, нэгээр нэмэгдэж, эдгээрийг 274.8 сая төгрөгөөр үнэлсэн байна. Мөн 50 сая төгрөгийн приус-20 автомашин, Лексус-470 автомашинтай. Түүнчлэн 5 сая төгрөгийн хурдан удмын нэг адуутай.

157 сая төгрөгийн зээлтэй.

3. Ц.Амарсайхан-Улсын дээд шүүхийн шүүгч;

Тэрбээр 2017 онд 76.9 сая төгрөгийн орлоготой байсан бол 2018 онд 85.5 сая төгрөгийн орлогтой болж өссөн байна. Харин гэр бүлийн орлого 17 саяас 20 сая төгрөг болж мөн л өсжээ.

301.5 сая төгрөгийн үнэтэй хоёр орон сууцтай бол 50 сая төгрөгийн үнэтэй Ланд крузер-100 автомашинтай. 27.8 сая төгрөгийн эзэмшлийн 500 м.кв, өмчлөлийн 425 м.кв, 587 м.кв, 595 мк газартай.

Хадгаламж, картны үлдэгдэл нь 16.7 сая төгрөг бол 55 сая төгрөгийн зээлтэй.

4. Б.Сайханцэцэг-Чингэлтэй дүүргийн Иргэний хэргийн анхан шатны шүүхийн шүүгч, Ерөнхий шүүгч;

Түүний жилийн орлого 2017 онд 61.9 сая төгрөг байсан бол 2018 онд 100 сая болж өссөн байна. Тэрбээр 2017 онд 400 сая төгрөгийн үнэтэй хоёр орон сууцтай байсан бол 2018 онд орон сууцгүй гэж мэдүүлсэн бол 170 сая төгрөгийн 2 хашаа, байшинтай болжээ.

Суудлын жижиг тэрэг нь 14 сая төгрөгийн үнэтэй, 30 сая төгрөгийн үнэ бүхий 30 үнээ, 45 сая төгрөгийн эзэмшлийн 700 м.кв, өмчлөлийн 700 м.кв газартай. 74.5 сая төгрөгийн үнэт эдлэлтэй гэжээ.

Мөн 2017 онд 471.8 сая төгрөгийн хадгаламж, картын үлдэгдэлтэй гэсэн бол энэ мөнгөн дүн нь 2018 онд 8.6 сая болж буурсан байна. Бусдаас 21 сая төгрөг зээлсэн гэжээ.

5. Д.Цолмон-Улсын дээд шүүхийн шүүгч

Түүний өөрийн орлого 2017 онд 47.3 сая байсан бол 2018 онд 66.3 сая болж өссөн. Гэр бүлийнх нь орлого 2017 онд 17.8 сая төгрөг байсан бол 2018 онд 24.6 сая болж мөн л өссөн байна.

Тэрбээр 435 сая төгрөгийн үнэтэй гурван орон сууц, авто зогсоолтой. 18 сая төгрөгийн үнэтэй суудлын 2 автомашинтай. 23.7 сая төгрөгийн үнэ бүхий хурдан удмын 3 адуу, 57 хонь, 27 ямаа, 4 үнэртэй.

Хадгаламж, картны үлдэгдэл нь 24.9 сая төгрөг, бусдаас 5.9 сая төгрөгийн авлагатай бол 3 патент эзэмшдэг.

6. Г.Цагаанцоож-Улсын дээд шүүхийн шүүгч

Түүний өөрийн орлого 2017 онд 63.9 сая байсан бол 2018 онд 65.3 сая төгрөг болж буурсан. Харин гэр бүлийн орлого нь 21.3 саяас 19.9 сая төгрөг болж буурсан байна.

325 сая төгрөгийн үнэтэй 1 орон сууц, 45 сая төгрөгийн Toyota, Highlander автомашинтай. Хадгаламж, картын үлдэгдэл нь 20.8 сая төгрөг, бусдаас 2017 онд 75.5 сая төгрөгийн авлагатай байсан бол 2018 онд 30 сая төгрөгийн авлагатай 130 сая төгрөгийн зээлтэй гэжээ.

7. Ж.Оюунтунгалаг-Нийслэлийн Иргэний хэргийн давж заалдах шатны шүүхийн шүүгч, Ерөнхий шүүгч

Түүний өөрийн орлого 2017 онд 50 сая байсан бол 2018 онд 59.1 сая төгрөг болж өссөн. Харин гэр бүлийн орлого нь 2017 онд 32.2 сая байсан бол 2018 онд 37.6 сая төгрөг болж мөн л өссөн.

284.9 сая төгрөгийн 2 орон сууц, 1 авто гражтай. 22 сая төгрөгийн RAW-4 автомашинтай. 16 сая төгрөгийн үнэт эдлэлтэй, хадгаламж, картын үлдэгдэл нь 88 сая төгрөг бол 110 сая төгрөгийн зээлтэй. 10 патент эзэмшдэг.

8. Д.Дэлгэрцэцэг-Нийслэлийн Иргэний хэргийн давж заалдах шатны шүүхийн шүүгч

Тэрбээр 2018 онд 48.7 сая, гэр бүл нь 40 сая төгрөгийн орлоготой байжээ. 204.7 сая төгрөгийн 3 орон сууцтай, 50 сая төгрөгийн приус-20, RX 400, Hyundai, Verna accent автомашинтай.

6.5 сая төгрөгийн 1844 м.кв газартай, хадгаламж, картын үлдэгдэл нь 12.3 сая төгрөг, 66 сая төгрөгийн зээлтэй.

9. Х.Сонинбаяр-Улсын дээд шүүхийн шүүгч, Иргэний хэргийн танхимын тэргүүн

Тэрбээр 2017 онд 61.3 сая байсан бол 2018 онд 65.2 сая төгрөг болж өссөн бол гэр бүлийн орлого нь 2017 онд 363.6 сая төгрөгөөс 419.1 сая төгрөг болж өсжээ.

Тэрбээр 297 сая төгрөгийн 2 орон сууцтай, 100 сая төгрөгийн үнэ бүхий Land Cruiser 200, Land Cruiser-80 автомашинтай. 20 сая төгрөгийн эзэмшлийн 1058 мк газартай, хадгаламж, картын үлдэгдэл 2.4 сая төгрөг.

10. П.Золзаяа-Улсын дээд шүүхийн шүүгч

2017 онд 45 сая төгрөгийн орлоготой байсан бол 2018 онд 58.8 сая төгрөгийн орлоготой болсон байна. Харин гэр бүлийн орлого нь 67.5 сая төгрөгөөс 79 сая болж мөн өсжээ.

Мөн 459 сая төгрөгийн 2 орон сууцтай, 204 сая төгрөгийн Land Cruiser 200 автомашинтай, 2 сая төгрөгийн эзэмшлийн 700 мк газартай, данс, картын үлдэгдэл нь 33 сая, 50 сая төгрөгийн авлага, 223.8 сая төгрөгийн зээлтэй.

11. С.Амардэлгэр-Баянзүрх дүүргийн Иргэний хэргийн анхан шатны шүүхийн шүүгч, Ерөнхий шүүгч

2017 онд 35.2 сая байсан бол 2018 онд 37.4 сая, гэр бүлийн орлого нь 2017 онд 22 саяас 2018 онд 31.5 сая төгрөг болж өссөн байна. 304 сая төгрөгийн 1 орон сууц,

38 сая төгрөгийн Prado автомашин, хадгаламж, картын 8.5 сая төгрөг, 204 сая төгрөгийн зээлтэй.

12. Т.Энхжаргал-Баянзүрх дүүргийн Иргэний хэргийн анхан шатны шүүхийн шүүгч

Тэрбээр 2017 онд 43 сая төгрөгийн орлоготой байсан бол 2018 онд 30.6 сая бол буурсан байна. 167 сая төгрөгийн 2 орон сууцтай, 7.6 сая төгрөгийн 25 хонь, 10 үхэр, 1 адуутай.

Хадгаламж, картын үлдэгдэл нь 3.3 сая төгрөг, 96.4 сая төгрөгийн зээлтэй.

13. Б.Нармандах-Нийслэлийн Иргэний хэргийн давж заалдах шатны шүүхийн шүүгч

Түүний орлого 2017 онд 154.7 сая байсан бол 2018 онд 70.9 сая төгрөг болж буурчээ. 157.7 сая төгрөгийн 1 орон сууцтай, хадгаламж, картын үлдэгдэл нь 1.5 сая төгрөг, бусдаас 12.5 сая төгрөгийн авлагатай бол 20 сая төгрөгийн зээлтэй.

14. С.Төмөрбат-Нийслэл дэх Захиргааны хэргийн анхан шатны шүүхийн шүүгч

2018 онд 41.9 сая төгрөгийн орлоготой байсан бол гэр бүл нь 2017 онд 21.9 төгрөг, 2018 онд 35 сая төгрөгийн орлоготой байжээ.

478.6 сая төгрөгийн 2 орон сууцтай, 30 сая төгрөгийн жийп автомашинтай, хадгаламж, картын үлдэгдэл нь 1.3 сая төгрөг, 91.5 сая төгрөгийн зээлтэй. УИД ХК, “ТРЗ” ХХК, Эрдэнэт Таван толгой ХК, Эрдэнэс Таван толгой ХК ХК, Авдрын уулын гол овоо Нөхөрлөл зэргээс хувьцаа эзэмшдэг.

15. Н.Нарантуяа-Багануур дүүргийн Эрүүгийн хэргийн анхан шатны шүүхийн шүүгч

Түүний орлого 2018 онд 52.5 сая байсан бол гэр бүлийн орлого нь 8.8 сая төгрөг.

175.1 сая төгрөгийн 3 орон сууцтай, 5 сая төгрөгийн эзэмшлийн 700 м.кв, өмчлөлийн 500 м.кв газартай. Бусдаас 10 сая төгрөгийн авлагатай бол 70.8 сая төгрөгийн зээлтэй.

16. П.Туяат-Хан-Уул дүүргийн Эрүүгийн хэргийн анхан шатны шүүхийн шүүгч

Тэрбээр 2018 онд 39.7 сая төгрөгийн орлоготой байсан бол 174.5 сая төгрөгийн 1 орон сууцтай, 14.5 сая төгрөгийн суудлын автомашинтай бол 122 сая төгрөгийн зээлтэй гэжээ.

17. Д.Байгалмаа-Нийслэлийн Иргэний хэргийн давж заалдах шатны шүүхийн шүүгч

2017 онд 50.9 сая байсан бол 2018 онд 53.5 сая болж өссөн. Гэр бүлийн орлого нь 47.6 саяас 30 сая болж буурчээ.263 сая төгрөгийн 2 орон сууцтай. 48.5 сая Mercedes Benz, G-300, Prius XW30, Микроавтобус, Жижиг оврын ачааны машинтай.

46.6 сая төгрөгийн тэмээ-2, ямаа-105, хонь-130, адуу-31, үхэр-27тэй. 48.4 сая төгрөгийн эзэмшлийн 700 м.кв, өмчлөлийн 700 м.кв газартай. Бусдаас 2.7 сая төгрөгийн авлагатай. 91.2 сая төгрөгийн зээлтэй. Нэг патент эзэмшдэг. 

Г.Нацаг-Эрдэнэ