Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгчид яллагдагч Э.Халиунбаяр, Б.Цолмонбаатар нарт авсан цагдан хорих таслан сэргийлэх арга хэмжээг хүчингүй болголоо. Учир нь дээрх яллагдагчдын өмгөөлөгчдөөс гомдол гаргасныг энэ сарын 8-ны өдрийн шүүх хуралдаанаар хянан хэлэлцэв.  

Тус шүүхийн 2019 оны 07 дугаар сарын 04-ний өдрийн №239-я, 240-я дугаартай шүүгчийн захирамжаар “яллагдагч Э.Халиунбаяр Б.Цолмонбаатар нарт  эрүүгийн хэрэг хянан шийдвэрлэх ажиллагаанаас оргон зайлахыг завдсан талаар үндэслэл бүхий баримт мэдээлэл байгаа” гэсэн үндэслэлээр 1 сарын хугацаагаар цагдан хорих таслан сэргийлэх арга хэмжээ авсан байсан.. 

Гэвч Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.1-д заасан “эрүүгийн хэрэг хянан шийдвэрлэх ажиллагаанаас оргон зайлахыг завдсан” гэсэн үндэслэл тогтоогдсонгүй байна. Өөрөөр хэлбэл, яллагдагч нар өмнө авсан таслан сэргийлэх арга хэмжээг зөрчсөн, оргон зайлахаар хийсэн үйлдэл байгааг нотолсон баримтыг шүүх хуралдаанд гаргаж өгөөгүй буюу дээрх хуулийн зүйл заалтыг нотолсон үндэслэл бүхий баримт мэдээлэл, нотлох баримт зэргийн мөрдөгч болон прокуророос шүүхэд гаргаж өгөөгүй аж.

Тиймээс яллагдагчийн өмгөөлөгчөөс гаргасан гомдлыг шүүх хүлээн авч цагдан хорих шийдвэрийг хүчингүй болгож шийдвэрлэжээ.

Прокуророос яллагдагч Э.Халиунбаяр Б.Цолмонбаатар нарыг  Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авах санал гаргасан байна. Ингэснээр Э.Халиунбаяр, Б.Цолмонбаатар нар нь энэ сарын 08-ны өдрөөс эхлэн Монгол Улсын хилээр гадагш нэвтрэх эрхээ түр хугацаанд хасуулж байгаа юм. Түүнчлэн шүүхийн шийдвэрийн дагуу шүүх хурлын дараа дээрх яллагдагчдыг сулласан байна.