Өнгөрч буй долоо хоногийн халуун сэдвийн тоонд Ерөнхийлөгч Х.Баттулгын өргөн мэдүүлсэн Үндсэн хуульд нэмэлт, өөрчлөлт оруулах хуулийн төсөл, саналыг УИХ-ын гишүүдээс өргөн мэдүүлж, УИХ-аар хэлэлцэж байгаа хуулийн төсөлтэй уялуудах зорилгоор хэлэлцүүлэг хийлээ.
Гүйцэтгэх эрх мэдлийн хариуцлагыг нэмэгдүүлж, тогтвортой байдлыг хангах, Парламентын ардчиллыг төвөлшүүлж, ард түмний засаглах эрхийг хангах, Шүүх эрх мэдлийн хариуцлагыг дээшлүүлэх, хараат бус байдлыг хангах, Нутгийн удирдлагын тогтолцоог боловсронгуй болгох, Үндсэн хуульд оруулах нэмэлт, өөрчлөлтийн төсөл, санал дахь Байгалийн баялаг, эдийн засгийн бусад асуудал зэрэг сэдвийн хүрээнд хэлэлцүүлэг өрнөсөн.
Монгол Улсын Ерөнхийлөгч Х.Баттулга бүх хэлэлцүүлэгт өөрийн биеэр оролцож, байр сууриа илэрхийлсэн. Тухайлбал, Гүйцэтгэх эрх мэдлийн хариуцлагыг нэмэгдүүлж, тогтвортой байдлыг хангах чиглэлд орж буй өөрчлөлтийн талаар хэлэлцүүлгийн үеэр стратегийн орд газар, түүнтэй холбоотой гэрээг Засгийн газар УИХ-аар хэлэлцүүлэхгүй шийдэж байгааг шүүмжлэлсэн юм. Үүнээс гадна УИХ-ын гишүүдийг тоог 108 болгож нэмэгдүүлэх замаар эрх мэдлийг нь хумиж, хариуцлагыг чангаруулах ёстой онцолсон юм.
Харин МАХН-ын дарга Н.Энхбаярыйн зүгээс Засгийн газрыг ард түмэн байгуулдаг болъё. Ингэхдээ ард түмэн Ерөнхийлөгчийг сонгоод, Ерөнхийлөгч Засгийн газраа толгойлдог байх. Харин намууд өрсөлдөж, парламентад олонх, цөөнхийг бүрдүүлэх. Ингэснээр Засгийн газар, парламент хоёр хоорондоо огт холбоогүй болно. Үүнээс гадна, УИХ-ын гишүүдийн тоог 55 болговол зохистой, хоёр танхимтай парламент байх нь зөв гэдгийг хэлсэн нь багагүй шүүмжлэл дагуулсан.
Үндсэн хуульд нэмэлт өөрчлөлт оруулах асуудлаар УИХ-ын хоёр дахь хэлэлцүүлэг наймдугаар сарын 09-нд болно.
Үндсэн хуульд нэмэлт, өөрчлөлт оруулах хуулийн төсөл, саналын хэлэлцүүлгээс гадна дуулиан дагуулсан нэгэн хэрэг болсон юм. Энэ бол ТЕГ-ын дарга асан, хошууч генерал Б.Хурц болон УЕП-ын орлогч прокурор асан Г.Эрдэнэбат нарын есөн хүнд холбогдох хэрэг. Төр, нийгмийн зүтгэлтэн С.Зоригийн амь насыг хөнөөсөн хэрэгт буруутгагдан ял эдэлж буй иргэдийг эрүүдэн шүүсэн, гүйцэтгэх ажлын журам зөрчсөн хэрэгт буруутгагдаад буй тэдгээр иргэд өөрсдийгөө буруугүй хэмээгээд “Хэрвээ гэм буруутай үйлдэл хийсэн бол хариуцлагаа хүлээхэд бэлэн” гэдгээ илэрхийлээд буй. Энэ удаагийн шүүх хурлаар санаанд оромгүй үйл явдал болсон нь эрүүдэн шүүх ажиллагаанд гар бие оролцсон Ц.Амгаланбаатарыг гэрчээр оролцуулах санал гаргасан явдал. Зарим хуульчдын үзэж буйгаар эрүүдэн шүүлтийг Ц.Амгаланбаатар гардан гүйцэтгэсэн. Гэтэл ажил үүргээ гүйцэтгэж байсан төрийн албан хаагчдэд эрүүдэн шүүсэн хэрэг тулгаж буй нь хууль бус зүйл гэдгийг онцолсон. Ямартай ч шүүгчдэгч нарын нэг нь шүүх бүрэлдэхүүнээс татгалзсанаар шүүх хурал ирэх сарын 12-ныг хүртэл хойшилсон юм.
Б.Хурц нарт холбогдох шүүх хурал олны анхаарлыг татаж байх зуур 266 сая төгрөгийн хахууль авч, хятадын компанид давуу эрх олгосон Эрчим хүчний сайд асан М.Сономпилд дөрвөн жилийн ял оноосон юм. Зарим эх сурвалжийн өгүүлснээр түүнийг 266 сая төгрөг биш харин 15 сая ам.долларын хахууль авсан гэх мэдээлэл байна. Яг одоогоор энэ мэдээлэл батлагдаагүй ч гэлээ ортой байхыг үгүйсгэхгүй. Олны анхаарлыг татсан дээрх хоёр шүүх хуралтай зэрэгцэн баян, хоосноор нь ялгаварласан шийдвэрийг холбогдох байгууллагаас гаргалаа хэмээн иргэд дургүйцлээ илэрхийлээд байна. Энэ бол нийслэлийн авто замын бүсчлэлийг гурван бүсэд хуваахаар болсон бөгөөд ингэхдээ A, B бүсэд өнгө үзэмжгүй болон торгуулиа төлөөгүй автомашиныг нэвтрэхийг хориглох шийдвэр гаргасантай холбоотой. Иргэдийн үзэж буйгаар хотын төвөөр зөвхөн гоё ганган машинтай иргэд зорчдог болох нь. Энгийн ард иргэдийн эрхэнд халдаж байна хэмээн цахим орчинд эсэргүүцлээ илэрхийлээд буй.
Ийнхүү ард нийт дуйргүйцлээ илэрхийлэхтэй зэрэгцэн Говь үйлдвэрт ажилд ороод гуравхан сар болсон 18 настай залуу лаганд унаж амиа алдсан харамсалтай хэрэг гарсан юм. Зарим эх сурвалж болон хэвлэл мэдээллийн байгууллын мэдээлж буйгаар уг ослыг Говь үйлдвэрийн ажилчид нуун дарагдуулах гэж ихэд хичээсэн гэх мэдээлэл бий. Говь үйлдвэр бол Таванбогд группийн охин компани. Таванбогд группийн мэдлийн KFC түргэн хоолны газарт хоолны хордлого гарч олон арван иргэн ХӨСҮТ-д хэвтэн эмчлүүлж байсан. Бүх нийтээр нь хордлогод өртүүлж, аюултай байдал үүсгэсэн байхад тус компанийнхан иргэдээс уучлал гуйсан нь нэгээхэн үгүй. Тэгвэл дуулиан намжаагүй байхад эл хэрэг гарсан нь хөдөлмөрийн аюулгүй байдал алдагдсан компани болохыг дахин баталлаа.
Түүнчлэн 10 сартай бяцхан хүү хананы толгойноос унжуулсан байсан уяанд орооцолдож амиа алдсан бол Сэлэнгэ аймгийн Булган суманд гарсан ой хээрийн гал түймрийг унтраах гэж байгаад түлэгдсэн дөрвөн залуугийн ар гэр хэвлэлийн хурал хийсэн юм. Ар гэрийнхний хэлж буйгаар хохирогчдын түлэнхийн хувийг бүрэн тогтоогоогүй, гадагшаа эмчилгээнд явах зайлшгүй шаардлагатай болсон байна. Тиймээс ард түмнээсээ тусламж гуйж байгаагаа хэлсэн. Учир нь Ерөнхий сайд У.Хүрэлсүхэд хандаж, тусламж хүссэн боловч өнөөг хүртэл шийдтэй хариу хэлээгүйг онцолсон юм. Уг мэдээллийн дараагаар түлэгдсэн залууст туслахаар урлаг, спортын залуус нэгдэж буй мэдээлэл цахим орчинд түгсэн юм.
