Залуу нас чи бурхан өгсөн хамгийн сайхан эгшиг хөг...

Цагаан цаасанд мөрөө үлдээх тас хар бэх шиг өнгө... гэдэг. Инээмсэглэлээр өөрийгөө чимж, үеийнхэндээ үлгэр жишээч амьдарч буй бүтээлч бүсгүй Ц.Зэс-Эрдэнэтэй уулзлаа. Эцэг, эхээс тавуулаа.  Нэг хүү, дөрвөн охинтой энэ гэр бүлийн амьдрал ахуй сонирхолтой агаад бахархам. Учир нь, аав ээжийн хайраас төрсөн хүүхдүүд бүгдээрээ гарын ур дүйтэй учир сувд, шүр хэлхэж, гоёл чимэглэл хийж, зурж, будахдаа тун гаргууд гэнэ.

Тэрбээр ШУТИС-ийн Техник, мэргэжлийн орчуулагчийн ангийг амжилттай төгсжээ. Хичээлээ хийхийн хажуугаар ээж, эгчдээ тусалж, урланд нь өдрийг өнгөрөөдөг байсан гэнэ. Шүр сувд хэлхэн бүтээл урлаж байхад нь “Эрэгтэй гоёл чимэглэл байна уу” гэж нэгэн залуу асууж орж ирсэн гэдэг. Эл үгийг сонссон Ц.Зэс-Эрдэнэд эрчүүдэд зориулсан бүтээл хийх сэдэл төрсөн гэдэг.

Хийж бүтээхийн хүслээр жигүүрлэсэн охин эрчүүдэд тохиромжтой, чамин чанартай бүтээл урлахын тулд тодорхой хугацаанд судалгаа хийжээ. “Тухайн үед материал ховор байсан. Модон эрхээ задлаад өөрт байгаа материалыг ашиглаж анхны   бугуйвчны загвараа гаргасан. Бугуйвчныхаа зургийг аваад фэйсбүүк хуудаст байршуулсан. Одоогоос таван жилийн өмнө, эрчүүд гоёл чимэглэл төдийлөн сонирхдоггүй байсан үе. Худалдаж авдаг ч хүн бараг байдаггүй байлаа. Тэглээ гээд шантраагүй. Эсрэгээрээ өнгө загварын өөрчлөөд хийгээд байлаа. Хүн хүссэн зүйлээ хийхэд хамгийн их аз жаргалтай байдаг. Хобби учраас улам бүр дурлаад хийгээд байсан” гэв.

40 МЯНГАН ТӨГРӨГӨӨР ЭХЭЛСЭН ОЮУТАН ОХИНЫ БРЭНД

Аливаа ажлыг хийх тусам аргын олдог. Түүний хамгийн анхны худалдаанд гаргасан бүтээл нь очиртой бугуйвч. Эр хүний хийморь сүлдэд ээлтэй учир очирыг төрөл бүрийн чулуутай хослуулан бугуйвч хийж эхэлсэн нь өнөөдөр эрчүүдийн дунд трэнд болсон брэндийг бий болгож чадсан нь түүний хөдөлмөрийн үр шим тууштай ажилласны гавьяа. Өдгөө мөнгө, зэс, гуультай очир бугуйвч нь эрчүүдийн бугуйг чимж, салшгүй хэрэглээ нь болжээ.

Ажилдаа чин сэтгэлээсээ хандвал хэзээ нэгэн цагт шагнал ирдэг. Гэхдээ түүний амжилтын зам тийм ч дардан байгаагүй. “Намайг анх хийж эхлэхэд хүмүүс төдийлөн гар урлалыг ойлгодоггүй байсан. Одоо бол маш сайн ойлгож, үндэснийхээ брэнд болгон хэрэглэдэг болчихсон юм шиг санагддаг” гэсэн юм.

Оюутан охин анх брэндээ бий болгох бизнесийнхээ эхлэлийг 40 мянган төгрөгийн санхүүжилтээр эхлүүлжээ. Таван жилийн өмнө манайд гар урлал төдийлөн хөгжөөгүй байсан. Өөрийн хүссэн үндэсний хэв шинжийг илтгэсэн бугуйвч хийхийн тулд өдөржин гоёл чимэглэл, чулуун болон эртний эдлэлийн дэлгүүрээр явж, өөрт таалагдах материалын эрэл хайгуул хийдэг байжээ.

Түүний хамгийн дуртай бүтээл нь зангуутай бугуйвч гэнэ. Бор, цагаан, хар арьстай зангуутай бугуйвч нь залуучуудаас эерэг үнэлгээ авч, трэнд болж, захиалга тасардаггүй байжээ.

Ажлынхаа арга барилыг олох тусам Ц.Зэс-Эрдэнэ бүсгүй бугуйвчныхаа загварыг өөрчилж, шинэлэг санаатай уялдуулан хийсээр байв. Бүр багцалсан хос бугуйвчуудыг хүртэл худалдаанд гаргасан байна. Энэ нь хосуудаас эерэг үнэлгээ авч, одоо ч байнгын худалдаанд гаргадаг загваруудынх нь нэг болжээ. Бүтээлч бүсгүй одоогоор 1000 гаруй загвар гаргасан байна.

“2016 онд арьстай хослуулж хийсэн зангуутай загвар маань залуучуудын дунд трэнд болж байсан. Хоёр ширхэг чулуун бугуйвчтай багц гаргаж байв. Гаднаас зангуугаа захиж авчруулдаг байсан болохоор өнгө алдчихаад байсан. Тэр үеэс хойш тэр загвараа ахиж худалдаанд гаргаагүй. Харин одооноос зангуугаа зэс, гууль, мөнгөөр гаргахаар хамтарч ажилладаг дархантайгаа ярилцаад дахин хийж эхэлсэн. Ямартай ч өнгө алдахгүй. Бэлгэдэл загварууд нь гарсан байгаа.

Тун удахгүй худалдаанд гаргахаар ажиллаж байна. Зөвхөн эрчүүдэд гэлтгүй эмэгтэйчүүдийн эрхэмсэг гоог илтгэсэн ээлтэй чулуу нь гоёлыг ч хийж байгаа. Бугуйвч болон зүүлт хийдэг” гэв. Хичээлээ хийхийн хажуугаар брэнд бий болгоно гэдэг хэн хүний хийж чадах, хүслээр болох ажил биш. Энэ их ажлынхаа хажуугаар их сургуулийнхаа магистрийн төлбөрийг өөрөө төлсөн гэхээр түүнийг зорьсон зүйлдээ тууштайг илтгэнэ.

ХҮҮХДЭЭ ХАРДАГ ЭЭЖҮҮДИЙГ ГЭРЭЭР НЬ АЖИЛЛУУЛЖ ЦАЛИНЖУУЛДАГ “ЗЭС” БРЭНД

Үндэсний брэндээ өөрийнхөө хичээл зүтгэлээр бий болгосон бүсгүй хэд хэдэн хүнийг цалинжуулдаг болжээ. Бусдыг орлоготой болгох боломжийг нээж өгсөн тэрбээр заавал залуу боловсролтой хүнийг ажилд авахыг эрхэмлэдэггүй. Учир нь, гэртээ хүүхдээ хардаг ээжүүдэд хэмжээний цалин олгож, хамтарч ажилладаг байна. “Хийсэн хэмжээгээр нь цалинжуулна. Олон бугуйвч хийвэл нэлээд их хэмжээний мөнгө авна.

350-400 орчим мянган төгрөгийг өрхийн орлогодоо нэмэрлэнэ гэдэг хүүхдээ хардаг ээжүүдийн хувьд тун боломжийн ажил шүү дээ” 

Түүний хэлсэн үг үнэний ортой. Нялх хүүхдээ хардаг ээжүүдийн хувьд санхүүгийн асуудал хумигдмал байдаг нь нууц биш. Тиймээс ээжүүдийг дэмжин ажиллаж байгаа нь нийгмийн хариуцлагын хүрээнд ч, нөгөө талаар эмэгтэй хүний хувьд хамгийн зөв шийдвэр юм. Ажиллаж байгаа ээжүүддээ хандаж сайн хийхийг зөвлөж, урмын сайхан үгсийг хэлж, алдаа дутагдал гаргавал зэмлэж, цалингаа аль болох уян хатан байдлаар олгодог аж.

БРЭНДИЙН ДЭЛГҮҮРЭЭ ЕВРОПТ НЭЭХИЙГ ХҮСДЭГ

Монголдоо анхдагч эрчүүдийн салшгүй хэрэглээ болсон “Зэс” брэндийг үүсгэн байгуулагч Ц.Зэс-Эрдэнэ материалаа сонгож, бугуйвчаа хийх, эзэнд нь хүргэж өгөх гээд бүхий л ажлыг өөрөө хариуцаж хийдэг. Хүргэлт хийхдээ урмын сайхан үгсээр “услагдаж” улам илүү хичээж ажиллах эрч хүчийг авдаг гэнэ. Түүний хийсэн бугуйвч эх орныхоо эрчүүдийг гоёхоос гадна гадаадад амьдардаг монголчууд ч захиалж авах эхлэлийг тавьжээ.

Монгол бүсгүйн урласан бүтээл дэлхийгээр тархаж, олон эрчүүдийн салшгүй хэрэглээ болгож чадсан түүний мөрөөдөл Европын оронд брэндийнхээ дэлгүүрийг нээх туйлын хүсэлтэй. “Хотын гудамжаар алхаж байхад манай брэндийн бугуйвчийг зүүсэн залуустай их таардаг. Хэдэн жилийн нөр их хөдөлмөрийн минь үр шим шүү дээ гэж бодохоор сайхан санагддаг юм. Таньдаг хүмүүс нь ирж мэндлээд, “Таны хийсэн бүтээлээр гоёж байгаа. Амжилт хүсье” гэдэг” гэв.

Аливаа ажлыг хийхэд алдаа оноо хамт дэнслэгдэнэ. Бүтэлгүйтэж, шантрах үе бишгүй олонтаа тохиолдоно. Гэхдээ тэрбээр ухааны цараар шийдэж, урагшилсаар байгаа нь “бүхий л зүйлд чин сэтгэлээсээ ханд” гэж хэлэх дуртай үгтэй нь холбоотой биз.

Ажилдаа дурлаж, амжилтын зүг рүү алхаж яваа Ц.Зэс-Эрдэнэ бүсгүй эх орныхоо үзэсгэлэнт байгалиар төдийгүй Европын хэд хэдэн орноор аялж, амьдралынхаа түүхийг хүмүүний орчлонд  сийрүүлж, үеийнхэндээ үлгэр дуурайлал болж байгаа түүнээр бахархаж байсныг нуух юун.

С.Ичинхорлоо

Дараах линкээр орж илүү ихийг үзээрэй. https://www.facebook.com/zesbrand/