Хөвсгөл аймагт зам тээврийн ноцтой осол гарч 29 настай эмэгтэй амиа алдсан талаар ТЦА-аас мэдээлэл хийлээ.
Энэ талаар ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн хошууч Б.Лхагважаргал “Дээрх хэргийн улмаас нэг амиа алдаж, гурван хүүхэд, нэг том хүн гэмтсэн харамсалтай хэрэг гарсан. Хэргийн талаар хэвлэл мэдээллийн хэрэгслээр мэдээлэхдээ аль нэг талын гэм буруутай нь шүүхээр тогтоогдсон мэтээр цацаж байна. Уг хэрэгт мөрдөн шалгалтын ажиллагаа явагдаж байгаа.
Түүнчлэн энэ хэрэг хэвлэл мэдээллийн хэрэгслээр цацагдаж байгаа нь осол хэргийн хор нөнөөл ямар их гуниг хагацлыг дагуулдаг вэ гэдгийг харуулах, сэрэмжлүүлэх зорилгоор цацагдаж байгаа юм. Түүнээс биш хэн нэгэнд буруу өгч, нэг талыг зөвтгөх, мөрдөн байцаалтын үйл ажиллагаанд нөлөөлөх гэсэн зүйл байхгүй.
Ослын улмаас бэртсэн нэг хүн өнгөрсөн даваа гарагт эмнэлгээс гарсан. Мөн гэмтсэн гурван хүүхдийн хоёр нь биедээ хүнд гэмтэл авсан тул тул үргэлжлүүлэн эмчилгээгээ хийлгэж байгаа гэсэн мэдээллийг ГССҮТ-өөс бидэнд өгсөн.
Осол гарсан тухайн газар нь аймгийн хэмжээнд нэлээд осол гардаг хар цэгийн судалгаанд орсон газар байгаа юм. Тиймээс тухайн газарт тэмдэг тэмдэглэгээ болон бусад сэрэмжлүүлэх самбар мэдээллийг тодорхой зайнд байршуулж өгсөн. Учир нь хөрсний цикл ихтэй, өвөлдөө хөлддөг, зундаа гэсэлт явагддаг овон товонтой газар байдаг. Тухайн үед хоёр талын жолооч архи, согтууруулах ундааны зүйл нь хэрэглээгүй нь тогтоогдсон. Хэрэг мөрдөн байцаалтын шатанд явагдаж байгаа тул бусад мэдээллийг өгөх боломжгүй” гэв.
Б.Лхам
