ОХУ-ын Сибирийн бүс нутагт ой хээрийн түймэр гарч, олон мянган га газрыг хамраад байгаа талаар бид өмнө нь мэдээлсэн. Тэгвэл ОБЕГ-аас уг мэдээлэлтэй холбогдуулан дараах тайлбарыг өглөө.

ОБЕГ-ын Гал түймэртэй тэмцэх газрын ахлах мэргэжилтэн, хошууч П.Соронзонболд “Он гарсаар улсын хэмжээнд 88 удаагийн ой хээрийн түймэр бүртгэгдсэн. Хамгийн сүүлд долдугаар сард Сэлэнгэ аймгийн Мандал, Ерөө зэрэг сумдад гарсан түймрийг долдугаар сарын 19-ний өдөр бүрэн унтрааж хүлээлгэн өгсөн. Өнөөдрийн байдлаар улсын хэмжээнд ой хээрийн түймрийн бүртгэл мэдээлэл ирээгүй байна.

Түүнчлэн Сибирьт гарсан ой хээрийн түймрийн талаарх мэдээллийг агаараас татан авч үзэхэд ойролцоогоор 700 орчим км-ийн зайд байсан. Энэ нь Байгаль нуурын цаана гарсан түймэр юм. Үүнээс наад талд нь Эрхүү, Улаан-Үд зэрэг хотууд бий. Мөн ОХУ-ын хилийн бүсэд түймэр байхгүй байна.

Он гарсаар ОХУ-ын талаас таван удаагийн ой хээрийн түймэр Дорнод, Хэнтий аймгийн сумдаар давж орж ирсэн. Утааны хувьд өнгөрсөн даваа гарагаас эхлэн ажиглагдаж эхэллээ. Хиймэл дагуулаас харахад өнөөдрийн байдлаар Булган, Хөвсгөл, Төв зэрэг аймаг болон нийслэл хотод тарж байна. Энэ нь салхины чиглэлээр агаарт тархаж байгаа юм. Түүнээс биш Эрхүү хотод гарсан түймэр шууд тархаад ороод ирж байгаа юм биш гэдгийг иргэд зөвөөр ойлгох хэрэгтэй.

ОХУ-ын хэвлэл мэдээллийн хэрэгслээр дамжуулж байгаа мэдээллээс харахад түймэр унтраах зардал нь түймрийн хохирлын зардлаас даваад байна гэсэн. ОХУ-аас гарсан түймэрт ямар арга хэмжээ авч байгаа талаар одоогоор мэдээлэл алга байна. Галын байдлыг харахад ойролцоогоор нэг сая орчим га газрыг тархсан байна” гэлээ.

Б.Лхам