Засгийн газрын долдугаар сарын 3-ны өдрийн тогтоолоор Үлэг гүрвэлийн музейг татан буулгах шийдвэр гарсан. Уг шийдвэрийн дагуу өчигдөр үүд хаалгаа хаах талаар тус музейн захирал Н.Жавзмаа хэлж байсан юм.

Тэгвэл уг мэдээлэлтэй холбогдуулан БСШУСЯ-аас мэдэгдэл гаргажээ. Тодруулбал, Тус яамны Соёл, урлагийн газрын мэргэжилтэн Б.Даваацэрэн “Үлэг гүрвэлийн музей хаагдаагүй хэвийн үйл ажиллагаатай байгаа. Харин Засгийн газрын шийдвэрээр Үлэг гүрвэлийн музей болон Байгалийн түүхийн музейг нэгтгэх шийдвэр гаргасан. Өмч хөрөнгө бусад эд зүйлсийн тухайд Үлэг гүрвэлийн музей Байгалийн түүхийн музей рүү шилжинэ. Гэхдээ энэ бол бүгд цаасан дээр хийгдэнэ. Бодит байдал дээр музейд дэглэсэн байсан үйл ажиллагаа хэвийн үргэлжилнэ. Үзүүлбэрүүд Байгалийн түүхийн музейн сан хөмрөгөд харьяалагдаж байгаа бүтээлээр баяжигдаж хүмүүст хүрэх юм.

Байгалийн түүхийн музейн барилгыг 2013 онд тус барилгын дотор ямар нэг үйл ажиллагаа явуулж болохгүй хэмээн дүгнэлт гаргаж хаасан. Үүнээс хойш газрыг ингэх гэж байна гэсэн мэдээлэл их гарч байгаа. Өнөөдрийн байдлаар Байгалийн түүхийн музейн газрыг аль нэг байгууллагад шилжүүлсэн асуудал байхгүй. Харин музейн зориулалтаар барилга барьж Чингис хааны музей болгоно.

Байгалийн түүхийн музейд хадгалагдаж байгаа сан хөмрөг, байгалийн өвүүдийн хадгалалт, хамгаалалттай холбоотой гаргаж байгаа нэг агуулга. Нөгөөтэйгүүр, хүүхэд, залуусын боловсролыг нэмэгдүүлэх, мэдлэгийг тэлэхэд чухал. Энэ хэрэгцээ шаардлагыг үндэслэн нэгтгэе гэсэн шийдлийг гаргасан” гэв. 

Б.Лхам