Өнгөрсөн амралтын өдрүүдэд Тээврийн цагдаагийн алба нийт 458 дуудлагыг хүлээн авснаас зам тээврийн ослын шинжтэй 296 дуудлага, мэдээллийг шалгаж, шийдвэрлэжээ. Бүртгэдсэн осол, хэргийн улмаас нийслэлд найман хүн гэмтэж, ноцтой зам тээврийн ослын улмаас орон нутагт нэг хүний амь нас хохирчээ.

Тухайлбал, энэ сарын 10-ны өдрийн 20.30 цагт Дорнод аймгийн Сэргэлэн сумын I  багийн “Бага зос” гэх газар шороон замд Kia Bongo автомашины жолооч Т нь 12 настай, эмэгтэй Х-г автомашины тэвшний хэсэгт тээвэрлэж яваад унагаж амь насыг нь хохироосон байна.

Архи, согтууруулах ундааны зүйл хэрэглэсэн үедээ замын хөдөлгөөнд оролцсоны улмаас гурван  хүн гэмтэж бэртсний хоёр нь явган зорчигч байсан бол нэг нь жолооч байжээ.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 72 жолоочийг илрүүлэн хуулийн дагуу хариуцлага тооцсон байна. 

Иймд архи согтууруулах ундааны зүйл хэрэглэсэн үедээ замын хөдөлгөөнд оролцохгүй байхыг Тээврийн цагдаагийн албанаас анхааруулж байна.