Монгол-Хятадын дипломат харилцаа тогтоосны 70 жилийн ой энэ жил тохиож байна. Энэ хүрээнд хоёр орны найрамдалт харилцаанд зориулан ирэх есдүгээр сарын 2-6-ны өдрүүдэд "Хятад орныг танин мэдэх" соёлын арга хэмжээ зохион байгуулахаар болсон байна.
Уг арга хэмжээг Хятадын төрийх зөвлөлийн хэвлэл мэдээллийн алба, БНХАУ-аас Монгол Улсад суугаа Элчин сайдын яам, Хятадын ӨМӨЗО-ны Ардын Засгийн газар БСШУСЯ, Улаанбаатар хотын Захиргаатай хамтран зохион байгуулж байгаа аж. Энэ үеэр уран сайхны тоглолт, үзэсгэлэн, аялал жуулчлалын танилцуулга, анагаах ухааны үнэ төлбөргүй оношилгоо, спортын арга хэмжээ зэргийг зохиохоор төлөвлөжээ.
Тухайлбал, энэ сарын 30, 31-ний өдрүүдэд "Мөрөн дээрх балет", "Пийпаагийн хэл" зэрэг сонгодог жүжиг Соёлын төв өргөөнөө тоглогдох аж. Мөн ирэх есдүгээр сарын 5-ны өдөр "Хайр бялхсан торгоны зам" циркийн үзүүлбэр, есдүгээр сарын 2-6-ны өдрүүдэд "Манай найрамдал", "Түмэн газрын цайны зам", "Хятадын хатгамлын урлагийн бүтээлийн үзэсгэлэн", "Монгол морины урлагийн бүтээлийн үзэсгэлэн" зэрэг гэрэл зургийн үзэсгэлэн Монголын үндэсний уран зургийн галлерейд болно. Түүнчлэн хоёр орны дипломат харилцаа тогтоосны ойн арга хэмжээн хүрээнд Хятадын кино өдрүүд болох юм байна. Тухайлбал, "Нүүдэлчин дэлхий", "Дүүлэн ниссэн он жилүүд", "Салхи хагалагч", "Томоогүй хорин найман нас", "Чонон сүлд", "Өмнөд туйл", "Сүүдэр", "Бичин багш хохимойн шуламыг гурвант дарсан үлгэр" зэрэг киног Тэнгис, Гэгээнтэн, Өргөө зэрэг кино театруудаар дамжуулан үнэ төлбөргүй иргэдэд үзүүлэхээр бэлтгэжээ.
Нийслэлийн Авто замын хөгжлийн газрын Бодлого, зохицуулалтын хэлтсийн хөдөлгөөн зохион байгуулалтын мэргэжилтэн О.Энхбаатар "Нийслэлийн Засаг Даргын Тамгын газар хоёр орны дипломат харилцаа тогтоосны ойд зориулж буй арга хэмжээг бүхий л талаар дэмжин ажиллана. Мөн энэ үеэр өдөрлөгт хамрагдах хүсэлтэй иргэдэд мэдээллийг цаг тухайд хүргэж ажиллах болно" гэлээ.
Б.Лхам