Төв аймгийн Зуун мод хотоос хойш, Богдхан уулын өвөр энгэрт байрлах 300 гаруй жилийн түүхтэй “Манзушри" хийдийг сэргээн засварлаж, жилд 1.3 сая жуулчин хүлээн авах хүчин чадалтай олон улсын хэмжээний аялал жуулчлалын бүс нутаг болгохоор болсон билээ. Энэ хүрээнд аялал жуулчлалын цогцолборын техник, эдийн засгийн үндэслэл болон зураг төслийг гаргахад есөн баг хамтран 2018 оны есдүгээр сараас хээрийн судалгааны ажил хийсэн байна. Тэгвэл өнөөдөр “Манзушри” хийдийн туурин дээр баригдах "Манзушри" соёл, шашин, аялал жуулчлалын цогцолборын төслийн нээлт өнөөдөр Монголын архитекторчдын холбооны хурлын танхимд боллоо. Нээлтэд төслийн санаачлагч, УИХ-ын гишүүн М.Энхболд болон Төв аймгийн удирдлагууд, Бурхан шашинтны төв Гандантэгчинлэн хийдийн тэргүүн хамба Д.Чойжамц нар оролцлоо.

Төслийн хүрээнд “Манзушри” хийдийн 49.6 га талбайг Ариун орон, Урлахуйн орон, Эрдэм дэлгэрүүлэх гэсэн гурван оронд хуваан хөгжүүлэхээс гадна аялал жуулчлалын төв болон байгалийн түүхийн музей байгуулж, нэртэй уран дархчуудын төв, задгай театр, шашны сургууль, зочид буудал байгуулна. Мөн Зайсангийн ам-Дугуй цагаан-Цэцээ гүний оргил-Манзушри хийд чиглэлд агаарын замын төлөвлөлтийг хийсэн бөгөөд ингэснээр өдөрт 5000 орчим хүнд 13 минутын хугацаанд агаарын тээврээр үйлчлэх боломж бүрдэх аж.

Хэтдээ тус хийдийг зорин ирэх жуулчдын 77 хувь нь агаарын замыг ашиглах бол 23 хувь нь автозамаар зорчино гэдгийг төслийн мэргэжилтнүүд хэлсэн юм.

Өнөөдрийн байдлаар тус хийдээр жилд 30-60 мянган хүнд тасалбараар үйлчилдэг гэсэн судалгаа байдаг аж. Гэхдээ яг нарийвчилсан тооцоогоор жилдээ ойролцоогоор 100-120 мянган хүн зочилдог байх магадлалтай гэдгийг аялал жуулчлалын судалгааг хариуцан хийсэн “Хаппи сити” группийн захирал Д.Мөнхтөмөр хэлсэн юм. Энэ утгаараа тус бүс нутаг нь аялал жуучлалын цөм болох бүрэн боломжтой гэдгийг мөн онцолсон.  

Нээлтийн ёслолын үеэр “Манзушри” сангийн тэргүүн, төслийн санаачлагч М.Энхболд “Уул, ус, хангай дэлхийг нь тахин шүтэж ирсэн сайхан уламжлалыг шинжлэх ухааны үндэслэлтэй хоршуулан хэрхэн хөгжүүлж болдогийг харуулах зорилгоор энэ төслийг санаачиллаа. Төсөл эцсийн байдлаар бэлэн болсон. Хэдхэн хоногийн дараа шинээр тодорсон VII Манзушри хутагт гэвш цолыг хүртэх ёслол ирэх сарын 6-нд Энэтхэг Улсад болно. Сангийн зүгээс болон өөрийн зүгээс шинэ цогцолбор байгуулахад бүх талаараа анхаарч хамтран ажиллана” гэлээ.