Уул уурхайн компанид дахин нэг осол болж, хүний амь эрсджээ. Тодруулбал, Дорноговь аймгийн Даланжаргалан суманд үйл ажиллагаа явуулдаг “Эко хэлхээ” ХХК-ийн жонш баяжуулах үйлдвэрийн хүдрийн нөөцийн агуулахад бөглөрсөн хүдрийг гаргахаар ажиллаж байсан тус уурхайн тээрмийн оператор Э шороонд дарагдан амь насаа алдсан хэрэг гарсан байна. 

Ослын газарт Онцгой байдлын газраас шуурхай ажиллаж уурхайн тээрмийн оператор Э-гийн цогцсыг энэ сарын 25-ны өдөр цагдаагийн байгууллагад шилжүүлэн өгчээ.

Талийгаач нь Улаанбаатар хотын Сонгинохайрхан дүүргийн XI хорооны оршин суугч юм байна. Осол болж, хүн амиа алдсан мэдээллийн дагуу тус сумын Засаг даргын Тамгын газрын таван ажилтан, уурхайн 40 ажилчин буюу нийт 45 хүн, хоёр автомашинтайгаар 11 минут ажиллаж иргэн Э /26 настай, эрэгтэй/-гийн цогцсыг 10.31 цагт гаргаж, цагдаагийн байгууллагад шилжүүлэн өгсөн байна.

Эх сурвалж: ОБЕГ