Монголын төрийн өндөр албан тушаалтнууд аль нэг “хэрэгт” холбогдох нь бий. Батлагдаж, нотлогдоогүй, хуулийн байгууллагаас эцэслэн тогтоодоггүй ч тэдгээрийг дагасан хэн нэгний шүүмжлэл сошиал орчинд давамгайлах нь бий. Ийм жишгээр олон нийтэд хардагдаж бас байцаагдан, асуулт нэхэж байгаа нэг хүн нь Б.Дэлгэрсайхан гишүүн. Түүнийг Дорноговь аймаг дахь “Босоо хөх монгол” ТББ-ын салбар зөвлөлийн дарга О.Хэрлэнд буу тулгаж, нохойгоор хазуулан, хээр аваачиж зодсон гэх утга бүхий мэдээлэл цацагдаад байгаа юм. Энэ тухай “Босоо хөх монгол” ТББ-ын тэргүүн улсын харцага Г.Ганхуяг, Дорноговь аймаг дахь тус бүлгэмийн салбар зөвлөлийн дарга О.Хэрлэн нар хэвлэлд тодруулга өгсөн нь өчигдөр. Тэдний зүгээс “Өнгөрсөн хавар мэдээлэл хийсний төлөө Б.Дэлгэрсайхан гишүүн биднийг цагдаад өгч, Зөрчлийн хуулиар 2 сая төгрөгөөр торгуулсан. Б.Дэлгэрсайхан гишүүн биднийг нохойгоор уруулаагүй ч түүнтэй хамт явдаг хүн заналхийлсэн гэж хардаж байгаа” гэсэн тайлбарыг өгсөн юм. Гэтэл үгүй байсан бололтой.

Учир нь, өнгөрсөн хавар Байнгын хорооны хуралдааны үеэр гишүүн Б.Дэлгэрсайхан “Шоронгоос суллагдсан иргэний бүртгэл Хууль зүй, дотоод хэргийн яаманд байна уу. Ял эдэлж байсан хүн шоронгоос гарч ирээд төрийн бус  байгууллага байгуулан, уул уурхайн компанийг шантаажилдаг боллоо” гэсэн нь уг асуудалтай холбогдсон бололтой. Түүний энэ мэдэгдэлтэй холбогдуулж “Эх орныхоо төлөө зүтгэж байгаа олон залуусыг яагаад шоронгийн хулгайч гэж хэлж байгаа юм. Бид хуулийн байгууллагад хандах болно” хэмээн Босоо хөх Монгол бүлгэмийнхэн мэдэгдэл хийв. Цаашлаад Б.Дэлгэрсайхан гишүүнийг “Гадны оронд тансаг хаустай, олон эхнэртэй, манай бүлгэмийн гишүүнийг нохойгоор хазуулсан” гэдгийг онцлов.

Эх сурвалжийн мэдээлж буйгаар уг асуудлаар Б.Дэлгэрсайхан гишүүн цагдаагийн байгууллагад гомдол гаргаж шалгуулжээ. Энэ дагуу шалгаж үзэхэд Зөрчлийн тухай хуулийн дагуу “Босоо Хөх Монгол”-ын нэр бүхий хүмүүст гүтгэх зүйл ангиар торгууль ногдуулсан бололтой. Шалтгаан нь "Босоо Хөх Монгол" ТББ-ын салбар аймгийн удирдлагууд гишүүн Б.Дэлгэрсайханыг гүтгэсэн болж таарав. Түүнийг нь хуулийн байгууллагаас тогтоосон хэрэг.  

Ташрамд дурдахад Дорноговь аймаг дахь “Босоо Хөх Монгол” ТББ-ын салбар зөвлөлийн дарга О.Х нь өмнө хүн амины хэргээр найман жилийн хорих ял авч байжээ. Харин “Босоо хөх Монгол” ТББ-ын Удирдах зөвлөлийн дөрвөн гишүүн БНХАУ иргэнд  хүч хэрэглэн заналхийлсэн, сүрдүүлж их хэмжээний мөнгө авсан хэрэгт сэжиглэн ШШГЕГ-ийн харьяа хорих 461 дүгээр ангид хоригдож, бусад тохиолдлоор ял авч байсныг эд мөрийн баримтад давхар хавсгарасан бололтой.

C.Сүлд