Ирэх аравдугаар сарын 1-нээс хуучны орон сууцны I давхарт нийтийн хоол үйлчилгээний зөвшөөрөл олгохгүй байх шинэчилсэн журам батлагдсан талаар ХХААХҮЯ болон нийслэлийн Мэргэжлийн хяналтын газар, Монголын хоол үйлдвэрлэл, үйлчилгээний мэргэжлийн боловсролын академи хамтран мэдээлэл хийлээ. Тодруулбал, манай улсын хэмжээнд 7800 орчим хоолны газар үйл ажиллагаагаа явуулдаг юм байна. Үүнээс 5000 гаруй нь бизнесийн салбар буюу ресторан, бар, кафе аж. Хэдийгээр хоолны үйлчилгээ эрчимтэй хөгжиж буй ч гэлээ зөрчил, дутагдал гарсаар байгаа учир худалдаа, нийтийн хоолны салбарт баримтлах стандарт, нэр томьёоллыг шинэчлэн баталсан байна.

Энэ талаар Нийслэлийн Мэргэжлийн хяналтын газрын Улсын ахлах байцаагч О.Нямдаваа “Барилга байгууламж болон хоолны чанар, аюулгүй байдал, ариун цэвэр чандлан сахиагүйгээс бол нийтлэг зөрчил гарч байна. Стандартын шинэчлэлээр хуучин орон сууцны нэгдүгээр давхарт хоолны газрын тусгай зөвшөөрөл олгохгүй. Түүнчлэн өмнө нь ажиллаж байсан газруудын хугацааг сунгахгүй. Гэхдээ доод давхрууд нь үйлчилгээ явуулах стандартын дагуу баригдсан орон сууцад энэ стандарт хамаарахгүй" гэлээ. 

Г.Алимаа