Энэ долоо хоногт Тээврийн цагдаагийн алба нийт 1243 дуудлагыг хүлээн авснаас зам тээврийн ослын шинжтэй 892 дуудлага, мэдээллийг хүлээн авч шийдвэрлдэжээ. Бүртгэгдсэн осол хэргийн улмаас нийслэлд 35 хүн гэмтэж, ноцтой зам тээврийн ослын улмаас нийслэлд гурав, орон нутагт гурван хүний амь нас хохирсон байна.

Тухайлбал, энэ сарын 27-ны өдрийн 07.30 цагийн үед Өвөрхангай аймгийн Нарийнтээл сумын I баг “Шарга” гэх газар “Ssangyong Istana А жолоочтой автомашин  онхолдож зорчигч 13 настай, эрэгтэй А нас баржээ.

Мөн энэ сарын 28-ны өдрийн 14.55 цагт Сонгиноайрхан дүүргийн 21 дүгээр хороо  Батсүмбэрийн зам, Рашаант өртөөний буудалд Toyota Landcruiser-200 маркийн автомашины жолооч Э нь Toyota Prius М жолоочтой автомашинтай мөргөлдөж, зорчигч 5 настай эмэгтэй Г, 2 настай эмэгтэй Э, 13 настай эмэгтэй Э нарын 3 хүүхэд гэмтсэн байна.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 108 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 35 хүнийг шүүхээр баривчилж хуулийн дагуу хариуцлага тооцсон байна. 

Энэ долоо хоногт бүртгэгдсэн зам тээврийн осол, хэргийг өмнөх долоо хоногийн нөхцөл байдалтай харьцуулахад нийт дуудлага мэдээлэл 3.6 хувиар, зам тээврийн ослын шинжтэй дуудлага 12.2 хувиар, гэмтсэн хүний тоо 40 хувиар, зам тээврийн ослын улмаас нас барсан  хүний тоо 20  хувиар өссөн байна.

 Тээврийн Цагдаагийн алба