Улсын Их Хурлын гишүүн Д.Хаянхярваагийн урилгаар Бүгд Найрамдах Солонгос улсын эмч, эмнэлгийн мэргэжилтнүүд Дархан-Уул аймгийн Орхон сумын иргэдэд эрүүл мэндийн үнэ тѳлбѳргүй үзлэг, оношлогоо хийж анхан шатны эмнэлгийн тусламж үйлчилгээ үзүүлэв.
Энэ сарын 29, 30-ны өдрүүдэд Орхон суманд зохион байгуулагдсан уг арга хэмжээг БНСУ-ын “Band for Good “ тѳрийн бус байгууллагаар дамжуулж Гванжу хотын захиргаа, тус улсын Эрүүл мэндийн байгууллагуудын тусламжтайгаар Орхон сумын ЗДТГ хамтран зохион байгуулсан юм. Гванжу хотын Чоннамын Их сургуулийн доктор, профессорын зэрэгтэй эмч, эмнэлгийн мэргэжилтнүүдээс бүрдсэн баг давхардсан тоогоор Орхон сумын 400 гаруй иргэдэд шүд, эрүү нүүр, нүд, дотор, эмэгтэйчүүд, мэс заслын чиглэлээр үзлэг оношлогоо хийхийн зэрэгцээ анхан шатны тусламж үйлчилгээг үзүүлж, зөвлөгөө өглөө. Монгол улсын төмс, хүнсний ногооны 19 хувийг дангаараа хангадаг, эрчимжсэн мал аж ахуй, газар тариалан, зөгийн аж ахуйг хослуулан хөгжүүлж ирсэн Орхон суманд УИХ-ын гишүүн Д.Хаянхярваа 2017 оноос хойш БНСУ-ын Гванжу хотын Залуучуудын байгууллага болон “Band for Good “ тѳрийн бус байгууллагатай хамтран соёл хүмүүнлэгийн олон талт арга хэмжээнүүдийг зохион байгуулж байгаа. Орхон сумын Засаг дарга Б.Алтансарнай “БНСУ-ын олон нийтийн байгууллагуудтай манай сумыг холбон орон нутгийн хөгжилд хувь нэмрээ оруулж байгаа Д.Хаянхярваа гишүүнд баярлалаа. Хамтын ажиллагааны хүрээнд сумын сургуулийн дотуур байрыг 2017 онд 20 гаруй сая төгрөгөөр засч тохижуулж, сургуулийн номын санд нэг сая төгрөгийн үнэтэй шинэ ном бэлэглэж байлаа.
Мөн 59 сая төгрөгийн санхүүжилтээр Бүрэнтолгой багийн гэр цэцэрлэгийг нарны эрчим хүчээр ажиллах тог цахилгаантай болгож өгснөөр үйл ажиллагаа нь тогтмолжиж улирал харгалзахгүй хүүхдүүдээ хүлээн авдаг болсон. Энэ жилийн хувьд эрүүл мэндийн үнэ төлбөргүй үзлэг оношлогоо хийхээс гадна сургуулийн байгалийн ухааны болон дуу хөгжмийн хичээлийн анги танхимын засвар, хичээлийн хэрэглэгдэхүүнийг шинэчлэлд 16 сая төгрөгийн буцалтгүй тусламж үзүүлж байгаад талархаж байна” гэв.
