Олон улсын соёлын солилцоонд оруулсан онцгой хувь нэмрийг үнэлэн олгодог ХБНГУ-ын албан ёсны шагнал болох "Гёте-Медаль"-ийн эзнээр Монгол Улсын иргэн Р.Энхбат тодорлоо.
Шагнал гардуулах ёслолын арга хэмжээ Йоханн Вольфганг фон Гётегийн төрсөн өдөр буюу энэ сарын 28-ны өдөр Ваймар хотод болсон байна. 1955 оноос олгож эхэлсэн уг шагналын эзнээр нийт 66 улсын 351 эрхэм тодорч байсан юм.
Гёте Институтийн зүгээс "Роозонгийн Энхбат нь Монголын иргэний нийгэм нээлттэй, шүүмжлэлтэй, хариуцлагатай байхын төлөө учирч болох хохирлыг үл харгалзан тууштай тэмцэгчдийн нэг юм. Тэрээр Монголын нийгэмд өрнөж буй гашуун үнэнийг олж тогтоох, тэр дундаа боловсролын тогтолцоог сайжруулахын төлөө сэтгүүл зүй болон хэвлэн нийтлэх салбарт ажилладаг. Түүний хичээл зүтгэл нь үнэн зөв байдал, нягт нарийн судалгаа ба цэгцтэй сэтгэн тунгаахын нэгэн жишээ болжээ" гэж онцолжээ.
Роозонгийн Энхбат 1958 онд Улаанбаатар хотноо мэндэлсэн. Тэрбээр хэвлэн нийтлэгч, Адмон группийн ерөнхий захирал юм. Мөн Лайпциг хотноо график, ном туурвих арга зүйн чиглэлээр суралцаж төгсөөд, зурагчин, МОНЦАМЭ агентлагийн эрхлэгчээр цөөнгүй жил ажиллажээ.
Тэрбээр 1996 онд Адмон хэвлэх үйлдвэрийг эрхлэх болж, улмаар 2000 онд Монсудар хэвлэлийн газрыг байгуулсан нь эдүгээ дэлхийн уран зохиол, толь бичиг, хүүхдэд зориулсан ном болон орчин үеийн сурах бичиг зэрэг зохиол бүтээлээрээ салбартаа тэргүүлэгч болон өргөжжээ.
