Үзэгчдийн дунд хүлээлт үүсгээд буй “Надтай үлдээч” жүжиг нээлтээ хийхэд дөрөв хоног үлджээ. Энэ хугацаанд жүжигчдийн хувьд ч гэсэн чанартай уран бүтээлээр үзэгчдэдээ бэлэг барихаар дор бүрнээ бэлтгэл сургуулилтаа хийж хичээж ажиллаж байна. Ингээд анхны гол дүрээ бүтээж буй Д.Асардарьтай хэсэг хором ярилцсанаа хүргэе.
-Юуны өмнө танд баяр хүргэе. Энэ дүр таны бүтээж буй анхны гол дүр гэж сонссон. Энэ утгаар гол дүрийн бүсгүйн дүрийг хэрхэн бүтээх нь үзэгчдэд их сонирхолтой байгаа болов уу. Та дүрдээ орохын тулд хэр ажиллаж байна вэ?
-Гол дүр авсандаа маш их баярлаж, сэтгэл хөдөлж байна. Үүнтэй зэрэгцэн маш их хариуцлагатай байх шаардлагатай. Анхны гол дүр гэдэг анхных л байдаг юм байна. Заримдаа туршлага дутах асуудал гарна. Мөн төдий чинээгээр сурах зүйл ч их байлаа.
-“Надтай үлдээч” жүжгийн гол дүрийн эмэгтэйн талаар ярьж өгөөч. Хувь хүнийхээ хувьд ямар хүн бэ?
-Би энэ жүжигт Нандингийн дүрийг бүтээсэн. Энэ эмэгтэй бол өөрийн гэсэн үзэл бодолтой, биеэ даасан эмэгтэй. Гэвч ээж, аавынх нь хувьд охиноо том болсоныг нь мэдсэн хэрнээ дүүлэн нисэх далавчийг нь хумиад л байдаг. Мөн уг жүжгийн хувьд “бодитоор хайрла, бодитоор дурла” гэсэн уриатай. Учир нь зарим залуус цахим сүлжээний цаанаас л олон цагаар харьцдаг. Үүний оронд ядаж биенийхээ нүд рүү харж байгаад чин сэтгэлээ ярилцдаг байсгаасай гэж хүсч байна.
-Жүжгийн бэлтгэлийг харж суулаа. Гэр бүлийн үнэ цэнийн тухай гарч байсан. Та гэр бүлийн үнэ цэнийг юун дээр тогтдог гэж боддог вэ?
-Миний бодлоор гэр бүлийн үнэ цэнэ итгэлцэл, хайран дээр тогтдог. Итгэл гэдэг бүх юмны тулгуур юм шиг санагддаг. Ээж аав нь хүүхэддээ итгэнэ. Итгэл хүлээлгэсэн хүүхэд нь итгэлийг нь алдахгүй байхыг хичээнэ. Тиймээс итгэл маш чухал зүйл. Надад үнэнч, хэлсэндээ хүрдэг хүмүүс таалагддаг. Хэлсэндээ хүрдэг хүн итгэл даана, ямар ч зүйлд хариуцлагатай хандаж чадна. Итгэл байхгүй бол хайр, хүндлэл бүх юм байхгүй шүү дээ.
-Тэгвэл таны хувьд эр хүн ямар байгаасай гэж хүсдэг вэ?
-Миний хувьд хараахан амьдралын ханиа сонгож чадаагүй байна. Яг ийм тийм гэж хэлж чадахгүй нь ээ. Хайр сэтгэлийг ер нь төлөвлөх дургүй. “Надтай үлдээч” жүжигт ч гардаг. Санамсаргүй тохиолдлоор нэг залуутай хонож тэрхэн хугацаанд хайртай болдог. Улмаар түүний төлөө бүхнээ зориулж байгаагаар гардаг. Үнэхээр зүрх сэтгэлийг минь булаасан залуу гарч ирж юуны магад. Тиймээс төлөвлөх дургүй. Бурхан ямар хань илгээнэ түүнийг л хүлээн авна даа/инээв/.
-Жүжигчний мэргэжил таны мөрөөдөл байв уу. Яагаад энэ мэргэжлийг сонгоссон юм бэ?
-Арван жилийн сургуулийн сурагч байхдаа сэтгэл судлаач болно гэж боддог байлаа. Харин төгсөх жилдээ МҮОНРТ-ийн уран бүтээлийн олны хэсэгт тоглосон. Миний жүжигчин болох замыг энэ зүйл л зурж өгсөн дөө. Миний хувьд сургуулиас зохиож буй дуу хөгжим, бүжгийн тэмцээнд идэвхтэй оролцдог байсан юм. Энэ нь мөн жүжигчний мэргэжлийг сонгоход түлхэц болж өгсөн болов уу.
-Чөлөөт цагаа хэрхэн өнгөрүүлдэг вэ?
-Шүлэг бичих дуртай. Саяхан болоод өнгөрсөн “Ялагчийн цуваа” моно жүжгийн наадамд “Хар, цагаан, саарал” гэсэн моно жүжгийн зохиол бичиж оролцсон. Энэ нь миний хамгийн анхны жүжгийн зохиол байсан юм. Мөн кино зохиол бичиж байгаа. Жүжгийнхээ дараа цэгцтэй болгоно гэж бодож байна.
С.Нацагтовуу
