Хайр хаанаас эхлэлтэй вэ. Магад энэ хорвоод шинэ хүн мэндлэх тэрхэн мөчид хайр үүсэж, цаг хугацааны хязгаар хүртэл үргэлжилдэг байх. Эх хүүхдийн эрүүл мэндийн үндэсний төвийн эргэлтийн хэсгийн ханыг ширтэн зогсох зуур яагаад ч юм бэ, ийм бодол зурсхийн орж ирэв. Арга ч үгүй биз. Эмнэлгийн хананы булан тохой бүрээс хайр, энхрийлэл нэвт үнэртэхийг илэрхийлэх мэт нууцхан захидал хөвөрсөөр. Шинэ хүнтэй болж, хайрын баталгаагаа гардаж авсныхаа баярыг аавууд тус эмнэлгийн ханан дээр сийлэн үлдээжээ. Он цагийн холбоосыг нэхэн хөөвөөс тэртээ 2017 оноос эхлэлтэй захидлуудыг хараад уншихад гоё ч гэлээ эмнэлгийн хөөрхий ханыг эмтэлж, сүйтгэснийг хараад сэтгэлд харуусал эрхгүй төрүүлнэ.
“Шинэ хүнтэй боллоо, эмнэлгийн ажилчиддаа баярлалаа”, “Хүүтэй болоо, аавыг нь Нямка гэдэг юм шүү” гэсэн сэтгэлийн захиасууд. Харахад ч хөөрхөн ч, халаглах бас л шалтгаантай. Шинэхэн ээжийн халамжит хань, найз нөхөд, хамаатан садангийн хөл хөдөлгөөн үл тасрах ЭХЭМҮТ нь улсдаа номер 1-т тооцогддог эмнэлэг. Энэ утгаараа дөрвөн зүг, найман зохисоос тус эмнэлгийг зорих иргэд олон. Гэвч сайхны хажуугаар саар гэгчээр дээр хэлсэн шиг эмнэлгийн эргэлтийн давхар бүрийн ханыг ийнхүү хайрын захидлаар булж, сэглэхээс гадна ууж, идсэн ус, ундаа, идэш уушийнхаа савыг суусан газар бүртээ хаяжээ. Уг нь эмнэлгийн давхар бүрийн ханыг өнгө алагласан зургаар гоёж, давхар бүртээ сандар байршуулсан байх аж. Өвлийн цагт хүйтнийг эс тооцвол шинэхэн хүнтэйгээ хэдхэн хором уулзаад гарахад тийм ч муу орчин биш. Гэтэл зураг бүрийн эд эс ширхэг бүрийг өнгө өнгийн балаар сийлж, зарим ханыг ухаж сийчжээ.
Шинэхэн аавууд шинэ хүнтэй болсондоо баяртай байх нь дамжиггүй. Тэд үүлэн дээр хөвж буй мэт л баярлаж хөөрдөг байх. Гэхдээ энэ хөөрч, баярласан сэтгэлээрээ эмнэлгийн ханыг сэглэх нь даанч харамсалтай. Тиймээс л аавуудын хайраа илэрхийлэх хүслийг нь биелүүлдэг ХАЙРЫН ХАНЫН САМБАР гаргавал ямар бэ гэж бодов. Тэгвэл эмнэлгийн хана ч эвдрэхгүй, хайр сийлсэн хүн нь сэтгэл хангалуун байх болов уу. Ингэж л бодож эмнэлгийн үүдийг хэдэн өдөр сахив. Хайр сийлсэн хана. Шинэхэн хүнээ хүлээсэн аавууд ханан дээр сийлсэн хайрын захидлыг уншингаа цүнхнээсээ балаа гаргаж байгаа харагдав. Хоорондоо ярилцангаа “Яг тийм, ингээд бичье” гэцгээсээр ...
Г.Алимаа
