"Хятад орныг танин мэдэх" Монгол, БНХАУ-ын дипломат харилцаа тогтоосны 70 жилийн ойн арга хэмжээ "Нахиа" хүүхдийн ном солилцох хөтөлбөрөөр үргэлжилж байна.
Арга хэмжээнд Монголын сэтгүүлчдийн холбооны нэгдсэн эвлэл, БНХАУ-ын Соёл урлагын газрын төлөөлөл, МУБИС-ийн багш, оюутан, Монголын зохиолчдын холбооны төлөөллүүд оролцлоо.
БСШУСЯ, нийслэлийн Засаг даргын дэмжлэгтэйгээр БНХАУ-аас Монгол Улсад суугаа Элчин сайдын яам, ӨМӨЗО-ны Ардын Засгийн газартай хамтран хоёр улсын харилцан ойлголцлыг нэмэгдүүлэх, уламжлалт найрамдлыг бэхжүүлэх зорилгоор 2015 оноос хойш дээрх хөтөлбөрийг хэрэгжүүлжээ.
Мөн “Нахиа” хөтөлбөрийн хүрээнд хүүхэд багачуудад зориулсан үлгэрийн номын дөрөв дэх хэвлэл болох “Дэггүй сахиусан тэнгэрүүдийн дэгдээсэн үймээн” номыг танилцуулав.
Энэ үеэр БСШУСЯ-ны Соёл урлагийн бодлогын газрын дарга Б.Сэргэлэн “Хоёр улсын соёл урлагийн ном солилцооны ажиллагааны хүрээнд “Ёгт үлгэр”, “Монгол болон Дундад улсын хөгжлийн 30 цуврал” ном зэргийг солилцож, Монгол Улсын 21 аймаг 365 сумдын ерөнхий боловсролын сургууль, нийт 1200 орчим байгууллагуудад хүлээлгэн өгсөн. Бидний уламжлалт найрамдалт харилцаа улам өргөжин тэлэх болтугай” гэлээ.
Б.Лхам
