Гандантэгчэнлин хийдээс энэ сарын 6-8-нд "Даншиг наадам-Хүрээ цам 2019"-ийг зохион байгуулахаар болсон байна. Тодруулбал, 2008 онд анх суурийг нь тавьж байсан Гандантэгчэнлин хийдийн “Батцагаан” цогчэн дуганын нээлт энэ сарын 6-нд болох бөгөөд энэ үеэр “Самвад-III” олон улсын хурал болон "Даншиг наадам-Хүрээ цам 2019"-ийг зохион байгуулахаар төлөвлөсөн талаар Гандантэгчэнлин хийдээс өнөөдөр мэдээллээ. 

"Самвад-III" олон улсын хуралд Энэтхэг, Япон, Шриланк, Бутан, Камбож, Мьянмар, Тайланд, Бангладеш, Балба, Хонг Конг, Сингапур, Вьетнам зэрэг орны лам хуврагаас гадна Австри, Их Британи, АНУ, Швейцар, Бельги, Германы болон ОХУ-ын буддын судлалын нэр хүндтэй эрдэмтэн, судлаачид оролцож, илтгэл тавих юм байан Хүн төрөлхтний өмнө тулгамдсан асуудал болох Зөрчлөөс зайлсхийх, Байгаль орчны аюулгүй байдал, Азийн ардчилал зэрэг сэдвээр хоёр өдөр хэлэлцэх юм байна.

Энэ талаар Гандантэгчэнлин хийдийн Да лам Х.Бямбажав  "Батцагаан цогчэн дуган нь ХХ зууны эхэн үе гэхэд 108 баганатай, олон мянган лам хурах багтаамжтай байсан ч их хэлмэгдэлтийн үеэс эвдэрч эхэлсэн. Харин 2006 онд Монгол Улсын Засгийн газар, БСШУСЯ-ны захиалгаар Гандантэгчэнлин хийдийн 1080 лам хурах багтаамжтай "Батцагаан" их цогчэн дуганыг барьж эхэлснээр өдгөө барилгын ажил дуусаж, энэ сарын 6-ны өдөр нээлтээ хийх гэж байна. Дуганын бүтээн байгуулалтад зөвхөн монгол ажилчид оролцсон бөгөөд албан бус тоогоор 1500 гаруй хүн ажилласан" гэлээ. 

Шашин, соёлын наадам энэ сарын 5-ны өдөр Гандантэгчэнлин хийдийн Гандан дуганд хурал номын үйл ажиллагаагаар эхэлж, 8-ны өдөр 08.00 цагт Төв цэнгэлдэх хүрээлэнд Очирваань бурхны их тахилгаар үргэлжлэх юм байна.

Их Очирваань бурхны тахилгын дараа 09.00 цагт Дамдин цойжил тэргүүтэй бүх сахиусыг огшоосон цамын бүжиг зохион байгуулж, 15.00 цагт Даншигийн цол олгох 256 бөхийн барилдаан болно" гэв.

Уг арга хэмжээ нь үнэ төлбөргүй болно гэдгийг мөн онцоллоо.

Г.Алимаа