Монгол Улсын Ерөнхий сайд У.Хүрэлсүхийн ивээл дор зохион байгуулсан “Азийн ардын урлагийн их наадам”-ын шүүгчид оролцогчдыг доромжилж, шударга бус шүүсэн талаар нэр бүхий уран бүтээлчид мэдээлэл хийлээ. Тодруулбал, цуурч Б.Наранбат "2019 оны зургадугаар сарын 12-наас 16-ны хооронд зохион байгуулагдсан уг наадам маш сайхан наадам болох байсан. Наадмын шүүгч Б.Энхтуяа, Л.Хэрлэн, Б.Одсүрэн, Ж.Саруулбуян Д.Ариунболд нар шударга ажиллаагүй болохыг илчилсэн бичлэг олон нийтэд ил болсон.

Энэ яриа бичлэгийг хөрвүүлж, бичээд олон нийтэд ил болгоод байна. Жишээлбэл, аман хуурч н.Болормаа тоглох үед Б.Одсүрэн шүүгч “Европын орноор байдаг л хөгжим. Хэнд ч хэрэггүй зүйл. Хэн ч энэ хөгжмийг дуугаргаж чадна” гэж хэлснээс гална “Битбоксын хоёрыг товлочихсон гэж байна” гэж Д.Ариунболд хэлэхэд дэргэдэх шүүгч нь зөвшөөрч байгаа. Зарим оролцогчийг угсаа гарал, яс үндэс, царай зүсээр нь доромжилсон. Шүүгч Б.Одсүрэн “Алтай” хамтлагийн гишүүн Б.Ганзоригийг “Ганзориг нь уу. Хэдэн хотонгууд” гээд инээсэн. Тиймээс шүүгчид ардын авьяастнуудаас уучлалт гуйж, олон нийтэд мэдээллэхийг шаардаж байна” гэлээ.