БНСУ-ын Хүний нөөцийн удирдлагын яамны төлөөлөгчид Төрийн албаны зөвлөл дээр ажиллаж,  Төрийн албаны сонгон шалгаруулалт, түүнийг зохион байгуулах талаар харилцан туршлага солилцох зөвлөлдөх уулзалтыг зохион байгууллаа.

Энэхүү зөвлөлдөх уулзалтад Төрийн албаны зөвлөлийн дарга, гишүүд, яам, агентлагын мэргэжилтнүүд, БНСУ-ын Хүний нөөцийн яамны газар, хэлтсийн дарга нар оролцож өөр өөрийн орныхоо төрийн албан хаагчдыг сонгон шалгаруулдаг 7 ур чадварын чиглэлээрх дэлгэрэнгүй мэдээллийг харилцан солилцов.

Уулзалтын эхэнд Төрийн албаны зөвлөлийн дарга, гишүүд үг хэлж, ирэх аравдугаар сард эхлэх төрийн албаны ерөнхий шалгалтыг угтаж энэхүү зөвлөлдөх уулзалтыг хийж байгаа нь чухал ач холбогдолтой болохыг онцлов. Төрийн албанд оюуны өндөр чадвартай зөв хүнийг, зөв ажилд нь томилж зөв үр дүнд хүргэх чиглэлээр анхаарч ажиллаж байгаа талаар Төрийн албаны зөвлөл, БНСУ-ын Хүний нөөцийн яамны удирдлагууд онцлог, давуу тал, сургамжаа зөвлөлдлөө. БНСУ-ын Хүний нөөцийн яамны төлөөлөгчдийн зүгээс өөрийн орны Төрийн албаны шалгалтын агуулга, хэлбэр, тестийн сангийн боловсруулалт, зохион байгуулалтын талаараа танилцуулж, мэдээлэл хийсэн бол Монгол Улсын хувьд төрийн албаны ерөнхий шалгалтын агуулгын шинэчлэл, гадаад улсад суралцсан өндөр мэдлэг, ур чадвартай боловсон хүчнийг төрийн албанд ажиллуулах, төрийн албаны хүний нөөцийн бодлого, шийдвэрийн асуудлаарх хийгдэж буй ажлын үйл явцын талаараа танилцуулж хоёр улсын төлөөлөгчид харилцан туршлага судлах ярилцлагыг өрнүүлсэн юм. 

Зөвлөлдөх уулзалтын төгсгөлд БНСУ-ын Хүний нөөцийн удирдлагын яамны Хүний нөөцийн газрын дарга Ким Санг Ван хэлэхдээ “Монголын Төрийн албаны зөвлөлийн ажил үүрэг чанарын өндөр түвшинд гарах алхам хийгдэж байгаад сайшаалтай байна. Чадахуйн зарчимд суурилсан ажлууд өрнөж байгаа болохыг  ажлын үйл явцаас харж болохоор байна. Хэдийгээр хоёр орны тогтолцоо, хөгжил дэвшил ялгаатай ч Монголын Төрийн албаны зөвлөл нь төрийн албаны өөрчлөлт, шинэчлэлийн асуудалд хандаж байгаа хандлага, нөхцөл байдлаас гарах оролдлогууд оновчтой байгаад сэтгэл хөдөлж байна” хэмээн хэлснээр хоёр улсын туршлага солилцох энэ удаагийн зөвлөлдөх уулзалт амжилттай болж өндөрлөлөө.

.