Монгол Улсад атар газар эзэмшсэний 60 жилийн хүрээнд “Эрүүл хүнс- Эрүүл Монгол хүн” уриан дор зохион байгуулж буй “Намрын ногоон өдрүүд-2019” нэгдсэн арга хэмжээ энэ сарын 18- 24-ний хооронд Мишээл Экспо төв дээр зохион байгуулагдаж байна.

Арга хэмжээнд 16 аймгийн 30 сумын 250 гаруй ногоочин, таван төсөл хөтөлбөр, 20 хоршоо бүлгийн иргэдийн тариалсан төмс хүнсний ногоо, жимс жимсгэнэ, түүж бэлтгэсэн байгалийн жимсэнд Нийслэлийн мэргэжлийн хяналт, Дүүргүүд дэх МХХ-ийн улсын /ахлах/ байцаагчид хяналт тавьж, Нэгдсэн төв лабораторийн явуулын лаборатори түргэвчилсэн шинжилгээг үнэ төлбөргүй хийж ажиллаж байна.

МХЕГ-ын Хүнсний аюулгүй байдлын үндэсний лавлагаа лабораторид 25 гаруй нэр төрлийн төмс, хүнсний ногоо, жимс жимсгэнээс 95 дээж авч пестицидийн үлдэгдэл тодорхойлох, ургамал хорио цээр, нян судлал, шинжилгээнд өгчээ.

Мөн “Скай”, “Мишээл” худалдааны төвийн гаднах талбайн үзэсгэлэн худалдаанд оролцож буй 19 иргэн, аж ахуйн нэгжээс 33 нэр төрлийн төмс, хүнсний ногоо, жимс, жимсгэний дээжийг авч, цацрагийн хяналтын шинжилгээнд хамруулжээ. Лабораторийн шинжилгээний дүн гараагүй бөгөөд тандалт судалгаа үргэлжилж байна.