Цагдаагийн хурандаа Э.Бөхбатын эзэмшлийн орон сууцанд хууль бус автомат тоглоомын газар ажиллаж байгаа талаарх мэдээлэл өчигдөр цахим хуудсанд цацагдсан. Уг асуудлаар газар дээр нь очиж үзэхэд автомат тоглоомын газар мөн байв. Тэрбээр энэ талаар “Би мэдээгүй. Хэрэв мэдсээр байж таслан зогсоогоогүй бол хариуцлага хүлээхэд бэлэн” гэсэн утгатай зүйл ярьсан юм.

Уг нь тэр мэдэхийн дээдээр мэдэж байх учиртай. Учир нь тухайн газрыг өмнө нь харьяа дүүргийн цагдаагийн газраас нь хэд хэдэн удаа торгож, арга хэмжээ тооцож байжээ. Тэр өөрийн өмчийн газар нь ийм байхад мэдээгүй өнгөрнө гэж үү. Лав үгүй байх. Үнэхээр энэ талаар тэрбээр мэдээгүй байя гэхэд иргэдэд “үлгэр”-ийн мэт л санагдана. Цахим хуудсаар уртаас урт хөвөрч буй иргэдийн сэтгэгдлээс  харахад шүү дээ.

Ямартай ч хурандаа Э.Бөхбат уг автомат тоглоомын газар өмнө нь хаагдаж, нээгдэж байсан бол хариуцлага хүлээхэд бэлэн гэдгээ хэлсэн юм. Бүр өчиг залсан ч гэж хэлж болно.

Тодруулбал, дүүргийн цагдаагийн газрын алба хаагч тус газар нь өмнө хэд хэдэн удаа хаагдаж, торгууль төлж байсан гэв. Өөрөөр хэлбэл, цагдаагийн алба хаагчийн яриа ийн зөрсөн юм. Ингээд цагдаагийн хурандаа Э.Бөхбат болон тухайн орон сууцны харьяа Баянгол дүүргийн цагдаагийн нэгдүгээр хэлтсийн цагдаагийн хошууч Дэлгэрхангай нарын тайлбарыг хүргэе.

Э.Бөхбат: “Энэ үйл ажиллагааг мэдэж байсан бол хариуцлага хүлээхэд бэлэн”

Цагдаагийн хурандаа Э.Бөхбат “Би хариуцлага хүлээхгүй байх. Энд автомат тоглоомын газар ажиллаж байна гэж мэдсэн бол хэзээ ч ийм байлгахгүй байсан. Энэ барилга нурах гэж байгаа юм билээ. Дахин төлөвлөлтөд орчихсон байгаа. Тиймээс түрээслэгчид маань хоолны газраар явахаа болиод энэ газрыг түрээсэлсэн юм байна. Та бүхий ачаар мэдэж авлаа. Түрээслэгчдийн хууль бус ажиллагаа илэрсэн тул гэрээ цуцална. Намайг маш олон газраас шалгах байх. Өчигдрөөс эхэлж шалгаж эхэлсэн. Зарим нэг зүйлийг тогтоосон байх. Энэ үйл ажиллагаа илрээд хаагдаад буцаад нээгдээд байдаг байсан бол би хариуцлага хүлээхэд бэлэн байна. Энэ асуудлыг мэдэж авлаа. Би шалгуулах хүсэлтээ гарган шалгуулж байна” хэмээн тайлбарласан юм.

Ж.Дэлгэрхангай: Автомат тоглоомын газарт нийт 10 удаа торгуууль оногдуулсан

Баянгол дүүргийн цагдаагийн нэгдүгээр хэлтсийн цагдаагийн хошууч Ж.Дэлгэрхангай “Уг автомат тоглоомын газарт Баянгол дүүргийн цагдаагийн газраас Эрүүгийн цагдаагийн албатай хамтран нийт 10 удаа шалгалт явуулж, 20 сая төгрөгийн торгууль ногдуулсан. Тухайлбал, тус газарт өнгөрсөн онд таван удаа, он гарсаар таван удаа арга хэмжээ тооцон ажилласан.  Хамгийн сүүлд гэхэд энэ сарын 7-ны өдөр хоёр сая төгрөгийн арга хэмжээ авсан байна. Шийтгэлийг зөрчил гаргасан этгээд 15 хоногийн хугацаанд сайн дураар төлөх ёстой байдаг. Төлөхгүй бол шүүхийн шийдвэр гүйцэтгэх шугамаар төлүүлдэг юм. Хуульд мөрийтэй тоглоом ажлуулсан эвэл зохион байгуулсан этгээдэд хариуцлага тооцох залттай” гэв.

Юутай ч хурандаа Э.Бөхбат хариуцлага хүлээхэд бэлэн гэдгээ хэлсэн. Харин хариуцлага хүлээлгэх эсэхийг нь харах үлдлээ.

Б.Лхам