“Дэлхийн аялал жуулчлалын өдөр”, Аялал жуулчлалын салбар үүсч хөгжсөний 65 жилийн ойн хүрээнд Аялал жуулчлалын салбарын ойн төгөл байгуулах, Горхи-Тэрэлжийн түр буудаллах цэгийн шав тавих ёслол Чингис уулын энгэр, зуун ламын агуй бэлд болов. Энэхүү түр буудаллах цэгийг “Өндөр-Улаан тревел” компани өөрийн зургаан тэрбум орчим төгрөгийн хөрөнгө оруулалтаар 1400 квадрат талбайд түргэн хоол, нийтийн ариун цэврийн хэсэг, задгай театр, авто зогсоол гээд орчин үеийн аялал жуулчлалын салбарт хэрэгцээтэй бүх зүйлийг тусган барьж байгуулах юм байна. Манай орны аялал жуулчлалын гол чиглэл дэх авто зам дагуу үйлчилгээний цогцолбор байгуулах замаар зорчигч, жуулчдын аюулгүй, ая тухтай аялах нөхцөлийг үүгээр бүрдүүлж эхэлж байгааг онцлууштай.

Төр болон хувийн хэвшлийн түншлэлийн хүрээнд энэ чиглэлийн ажил анх удаа хийгдэж байгааг албаны хүн онцолж байлаа. Энэ төсөл хэрэгжих нь байгаль орчинд нөлөөлөх сөрөг нөлөөлөлийг бууруулж, Агуу хадыг зорин ирэх жуулчдыг нэгдсэн зохион байгуулалтад оруулах ач холбогдолтой юм. Төсөл хэрэгжих үндсэн талбай нь таван га бөгөөд уулынхаа энгэр дэх 10 орчим га талбайд БОАЖЯ, Горхи-Тэрэлжийн хамгаалалтын захиргаанаас Монголын үндэсний соёл заншлын хүрээлэн нэртэй байгууламжийг барьж байгуулахаа энэ үеэр дуулгалаа. Өнөөдрийн арга хэмжээнд БОАЖЯ-ны Аялал жуулчлалын бодлого зохицуулалтын газрын дарга С.Баясгалан, Горхи тэрэлжийн байгалийн цогцолборт газрын Хамгаалалтын захиргааны дарга Б.Хашмаргад, “Өндөр-Улаан тревел” компанийн гүйцэтгэх захирал П.Батхүү нарын хүндтэй зочид ирсэн юм.

Б.Жаргал