Мэргэжлийн болон тэргэнцэртэй бүжигчдийн хамтарсан "Encounters" буюу “Учрал” нэртэй контемпорари бүжгийн тоглолт ирэх аравдугаар сарын 05-нд “АСЕМ вилла театр”-т зохиогдохоор болжээ.
Тоглолтоор тэгш бус нөхцөл байдал, нийгмийн гарал үүслээс үл хамааран хүмүүс өөр хоорондын ялгааг хүлээн зөвшөөрч, нэгдэн холбогдоход ямар өөрчлөлт, шинэ боломжууд гарч болдгийг “Учрал” тоглолтоор үзүүлэхийг зорьсон аж. Бүжигчдийн өөр өөр ур чадвар дээр суурилан тэдний харилцан ойлголцол, зохицлыг бий болгох нь бүжиг дэглэлтийн гол аргачлал болжээ. Энэ утгаараа тэргэнцэртэй болон мэргэжлийн бүжигчид хоорондын нэгдэн уусах процессыг зохиолын гол хэсэг гэж үзэж байна.
Монголд анх удаа зохион байгуулагдах контемпорари бүжгийн тоглолтын бэлтгэлийг “YET Company”-ыг үүсгэн байгуулагч, Швейцарь улсын бүжиг дэглээч Фабиан Коны удирдлага дор хийж байна. Бүжиг дэглээч Фабиан Кон нь 2008 онд Берлиний Die Etage сургуулийг биеийн илэрхийллийн театр, үггүй жүжгийн чиглэлээр төгссөн бөгөөд контемпорари бүжиг, үггүй жүжиг, киноны салбарт чөлөөт уран бүтээлч, найруулагчаар ажилладаг уран бүтээлч ажээ.
