Үндэсний статистикийн хорооноос өнгөрсөн сарын нийгэм, эдийн засгийн талаар өнөөдөр танилцууллаа.

Улсын хэмжээнд 2019 оны эхний 9 сард 26.3 мянган гэмт хэрэг бүртгэгдсэн нь өмнөх оны мөн үеэс 2236 буюу 7.8 хувиар буурчээ. Харин залилах гэмт хэргийн тоо өмнөх оны мөн үеэс 305 буюу 7.8 хувь, мал хулгайлах гэмт хэрэг 584 буюу 85.3 хувь, хүний бэлгийн эрх чөлөө, халдашгүй байдлын эсрэг гэмт хэрэг 110 буюу 23.7 хувь, гэр бүлийн хүчирхийлэл үйлдэх гэмт хэрэг 49 буюу 27.1 хувь, хүрээлэн байгаа орчны эсрэг гэмт хэрэг 15.8 хувь, хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 8 хуиар өссөн байна.

Гэмт хэргийн улмаас учирсан хохирол 2019 оны эхний 9 сард 225.2 тэрбум төгрөг, нөхөн төлүүлсэн хохирлын хэмжээ 32.3 тэрбум төгрөг болж, өмнөх оны мөн үеэс учирсан хохирол 93.3 тэрбум төгрөгөөр, нөхөн төлүүлсэн хохирол 8.4 тэрбум төгрөгөөр өссөн байна. Согтуугаар үйлдсэн гэмт хэрэг 2019 оны эхний 9 сард 3142 болж, өмнөх оны мөн үеэс 943 буюу 42.9 хувь, эмэгтэй хүн оролцсон хэрэг 2193 болж, 183 буюу 9.1 хувь, бүлэглэн үйлдсэн хэрэг 1298, гэр бүлийн хүчирхийллийн улмаас үйлдэгдсэн хэрэг 789-өөр тус тус өсжээ.

Гэр бүлийн хүчирхийлэл үйлдэх гэмт хэрэг 2019 оны эхний 9 сард 229 бүртгэгдсэн нь өмнөх оны мөн үеэс 49-өөр өссөн байна.