Үндэсний статистикийн хорооноос өнгөрсөн сарын нийгэм, эдийн засгийн байдлын талаар танилцууллаа.
Улсын хэмжээнд 2019 оны эхний есөн сард 58081 эх амаржиж, 58525 хүүхэд төрүүлсэн нь өмнөх оны мөн үеэс 488-аар, төрсөн хүүхэд 563-аар тус тус өсжээ. Харин нас баралт 12723 болж, өмнөх оны мөн үеэс 177 буюу 1.7 хувиар буурчээ.
Улсын хэмжээнд нялхсын эндэгдэл 2019 оны эхний 9 сард 771 болж, өмнөх оны мөн үеэс 24-өөр, тав хүртэлх насны хүүхдийн эндэгдэл 930 болж, өмнөх оны мөн үеэс 62-оор буурсан байна. Нялхсын эндэгдэл энэ оны 9 дүгээр сард 90 болж, өмнөх сараас наймаар, тав хүртэлх насны хүүхдийн эндэгдэл 110 болж, 10-аар тус тус нэмэгджээ.
Нялхсын эндэгдлийн түвшин 2019 оны эхний 9 сард 13 болж, өмнөх оны мөн үеэс 1-ээр, тав хүртэлх насны хүүхдийн эндэгдлийн түвшин 16 болж, өмнөх оны мөн үеэс 1 хүүхдээр тус тус буурсан байна. Нялхсын эндэгдлийн түвшин 2019 оны есдүгээр сард 14 болж, өмнөх сараас 2-оор, харин тав хүртэлх насны хүүхдийн эндэгдлийн түвшин 17 болж, хоёр хүүхдээр тус тус нэмэгджээ. Эхийн эндэгдэл 2019 оны эхний 9 сард 13 болж, өмнөх оны мөн үетэй адил байна. 100000 амьд төрөлтөд ногдох эхийн эндэгдлийн харьцаа 2019 оны эхний 9 сард 22 болж, өмнөх оны мөн үетэй адил түвшинд байна.