Үндэсний статистикийн хорооноос өнгөрсөн сарын нийгэм, эдийн засгийн байдлаар танилцууллаа.

Тухайлбал, Халдварт өвчнөөр өвчлөгчид 2019 оны эхний 9 сард 32.3 мянга болж, өмнөх оны мөн үеэс 1168 буюу 3.8 хувиар нэмэгдсэн байна. Үүнд салхин цэцгээр өвчлөгчид 2428-аар, тэмбүүгээр өвчлөгчид 227-гоор, мөөгөнцрөөр өвчлөгчид 80-аар, сүрьеэгээр өвчлөгчид 114-өөр, гонококкт халдвараар өвчлөгчид 52-оор өссөн нь голлон нөлөөлсөн байна.

Харин гар, хөл, амны өвчнөөр өвчлөгчид 1274-өөр, цусан суулгаар өвчлөгчид 565-аар, трихомониазаар өвчлөгчид 127 тохиолдлоор буурчээ.

Түүнчлэн Эрүүл мэндийн яамны цахим бүртгэлээр Улсын хэмжээнд 2019 оны 9 дүгээр сард 6464 хүүхдэд регистрийн дугаар олгожээ. Нийт төрсөн хүүхдийн 3371 нь эрэгтэй, 3093 нь эмэгтэй, 148 нь ихэр, хүүхдийн дундаж жин 3389 грамм, дундаж өндөр 51 см байна.

Амаржсан эхчүүдийг насны бүлгээр харвал 4.4 хувь нь 20 хүртэлх насны, 91.8 хувь нь 20-39 насны, 3.8 хувь нь 40-өөс дээш насныхан байх бөгөөд эхчүүдийн 1.4 хувь нь боловсролгүй, 4.9 хувь нь бага, 13.5 хувь нь суурь, 37.2 хувь нь бүрэн дунд, 6.0 хувь нь техникийн болон тусгай мэргэжлийн, 36.3 хувь нь дипломын болон бакалаврын, 0.8 хувь нь магистр, докторын зэрэгтэй байгаа юм байна. Мөн амаржсан эхчүүдийн 52.7 хувь нь гэрлэлтээ албан ёсоор батлуулсан бол 45.9 хувь нь гэрлээгүй (гэрлэлтээ батлуулаагүй), 1.4 хувь нь гэрлэлтээ цуцлуулсан байна.