Нийслэлийн Онцгой байдлын газар, нийслэлийн Мэргэжлийн хяналтын газар болон нийслэлийн Эрүүл мэндийн газраас энэ сарын 14-нд угаарын хийнээс болж эмэгтэй хүн нас барсан гэх мэдээлэлд хариулт өглөө. Тодруулбал, албаны хүмүүс "Талийгаач эмэгтэйг яг угаарын хийнээс болж нас барсан гэдэг нь тогтоогдоогүй бөгөөд хамт байсан 60 орчим настай аав, ээжийнх нь биеийн байдал хэвийн байсан" гэдгийг өнөөдөр мэдээллээ. Түүнчлэн угаарын хийд хордож байгаа тохиолдол буруу галлагаанаас болж байгааг мөн онцолсон юм. Энэ талаар НОБГ-ын гамшгаас урьдчилан сэргийлэх хэлтсийн дарга Г.Нэргүй "Нийслэлийн хэмжээнд энэ сарын 14-нд угаарын хийд хордсон гэх долоон дуудлага бүртгэгдсэн. Эдгээр өрхийн 13 иргэн эмнэлэгт хандсан. Өнөөдрийн 06.00 цагийн байдлаар эмнэлэгт дөрвөн том хүн хоёр хүүхэд хэвтэн эмчлүүлж байна" гэлээ. Түүнчлэн амралтын өдрүүдэд дуудлага ихсэх хандлагатай байгааг онцлоод дуудлагын тоо болон эмнэлэгт хэвтэн эмчлүүлэх хүмүүсийн тоо буурч байгааг хэлсэн юм. Мөн өнгөрсөн долоо хоногт сайжруулсан шахмал түлшний зөв хэрэглээ болон пийшин зуухны галлагааны аюулгүй байдлын талаар зөвлөмж сэрэмжлүүлгийг хүргэсэн байна. Энэ сарын 3-15-ны өдрүүдэд угаарын хийн хордлогын 145 удаагийн дуудлагаар нийт 306 иргэн эмнэлэгт ханджээ. Үүнээс насанд хүрсэн 25, долоон хүүхэд хэвтэн эмчлүүлжээ.
Харин НМХГ-ын дэд дарга С.Даваасүрэн “Сайжруулсан түлшний дээжийг Гаалийн төв лаборатори, НМХГ-ын газрын дэргэдэх Хүсний аюулгүй байдлын лабораторийн цацрагийн хяналтын лаборатори, Геологийн төв лаборатори, Ашигт малтмалын төв лаборатори болон Хийн технологийн лаборатори гэсэн таван газраар шинжлүүлсэн.
Лабораторийн шинжилгээний хариугаар "аюулгүй" гэсэн ижил хариу гарсан. Энэ шинжилгээнүүдийн дүнг баталгаажуулах үүднээс гаднын хэд хэдэн оронд дахин шинжлүүлэхээр явуулсан. Одоогоор хариу ирээгүй байна. Түүнчлэн түлшний утаа гадаад орчинд гарахад хүний эрүүл мэндэд сөрөг нөлөөлөөгүй. Угаарын хийд хордож байгаа тохиолдол буруу галлагаанаас болсон байна. Таван толгой түлш ХХК-д 24 цагаар хяналт тавин ажиллаж байна" гэсэн юм.
Албаны хүмүүсийн хэлж буйгаар ханан пийшинд ан цав гарсан, яндангийн хаалтыг хагас нээсэн, яндангийн өндөр нь байшингын өндрөөс намхан учраас утаа буцаж орсон, мөн шахмал түлшийг их хэмжээгээр хийж галласан, зуухны үнс нь их хэмжээтэй байсан гэх мэт зөрчлүүд илэрсэн байна.
Энэ талаар нийслэлийн Агаарын бохирдлын газрын "Гэр хорооллоос үүдэлтэй агаарын бохирдол” хариуцсан мэргэжилтэн Г.Даваажаргал “2019 оны аравдугаар сарын 7-13-ны өдрүүдийн агаарын чанарын үзүүлэлтийг өнгөрсөн оны мөн үетэй харьцуулахад хүхэрлэг хий 12 хувиар өссөн, азот өсөөгүй, Pm10 тооцонцор өсөөгүй, Pm2.5 14 хувиар буурсан нь УЦУОШГ-ын мэдээллээс харж болно. Нүүрстөрөгчийн дутуу исэл буюу угаарын хий өссөн үзүүлэлт байхгүй. Азоны хувьд өнгөрсөн оны мөн үетэй ижил түвшинд байна" гэлээ.
Г.Алимаа
Сэтгэгдэл (4)