“Мартиньи-1989” насанд хүрэгчдийн дэлхийн аварга, “Улаанбаатар-1989” залуучуудын дэлхийн аварга, Европын болон Азийн аварга, ЗХУ-ын спортын гавьяат мастер, Буриадын алдарт бөх Борис Дугданович Будаевын нэрэмжит залуучуудын (2000-2002 он) олон улсын уламжлалт тэмцээн энэ амралтын өдрүүдэд ОХУ-ын Буриадын нийслэл Улаан-Үдэд боллоо.

XXVII удаагийн тэмцээн түүний дэлхийн аварга болсны 30 жилийн ойн хүрээнд зохион байгуулагдав. Тэмцээнд Монгол, Казахстан, БНХАУ, ОХУ-ын Буриад, Якут, Кемерово, Тува, Эрхүү, Ангарск, Хабаровск, Хакасия, Новосибирск, Забайкальский, Красноярский крайгийн нийт 200 гаруй тамирчин эрэгтэйчүүдийн 10 жинд өрсөлдөв. Улаан-Үдийн дэвжээнд манай улсаас “Хасу-Мегастарс”, “Хангай хүчтэн”, “Тулгат” клуб, “Аварга”, “Ирээдүйн одод”, Спортын төв сургуулийн 30 гаруй тамирчин хүч үзсэнээс гурван алт, гурван мөнгө, гурван хүрэл, нийт есөн медаль хүртлээ.

Тодруулбал, 61 кг-ын жинд “Хасу-Мегастарс” клубийн тамирчин Э.Төгсжаргал, 65 кг-д “Хас-Мегастарс” клубийн тамирчин Д.Тэнгис, 74 кг-д МУБИС-ийн тамирчин М.Тэмүүжин алт, 65 кг-д Сонгинохайрхан дүүрэг, “Тулгат” клубийн тамирчин О.Мөнх-Эрдэнэ, 70 кг-д Сонгинохайрхан дүүрэг, “Тулгат” клубийн тамирчин Б.Мөнхдаваа, 97 кг-д “Хасу-Мегастарс” клубийн тамирчин Б.Энх-Оргил мөнгө, 61 кг-д "Хангай хүчтэн" клубийн тамирчин Ш.Дэлэг, 70 кг-д “Хасу-Мегастарс” клубийн тамирчин А.Дөлгөөн, 86 кг-д "Хангарьд" клубийн тамирчин А.Мягмарсүрэн нар хүрэл медалийн эзэн боллоо.

Манай улсаас олон улсын хоёрдугаар зэргийн шүүгч ОУХМ Г.Амархүү, гуравдугаар зэргийн шүүгч Б.Энхжин, улсын шүүгч Э.Батнасан нар Улаан-Үдийн тэмцээнийг дэнсэллээ.