"Хүний эрхийн тухай ярилцъя" өглөөний ээлжит уулзалтаар “Мансууруулах болон сэтгэцэд нөлөөт бодисоос хамаарал бүхий иргэдэд үзүүлэх эмнэлгийн тусламж, үйлчилгээ, тулгамдсан асуудлууд” сэдвээр зохион байгууллаа. 

Энэ удаагийн уулзалтад Сэтгэцийн эрүүл мэндийн үндэсний төвийн Тамхи, мансуурлын асуудал хариуцсан мэргэжилтэн н.Гантулга, ЦЕГ-ын Хар тамхитай тэмцэх газрын эрүүгийн ахлах мөрдөгч Б.Эрдэнэдалай, сэтгэл судлаач, "Донтолт ба сэтгэл зүйн зөвлөгөө" номын зохиогч Д.Мөнхцэцэг, Хар тамхи бодисоос иргэдийг хамгаалах нийгэмлэгийн тэргүүн Ш.Лхагвасүрэн нар оролцсон юм. "Донтолт ба сэтгэл зүйн зөвлөгөө" номын зохиогч Д.Мөнхцэцэг "Хүн сэтгэлийн шаналалаас болж тэр дундаа сэтгэл хөдлөлөө илэрхийлдэггүй хүмүүс хар тамхинд донтож байна. Тиймээс хүүхдийг өсгөхдөө сэтгэл хөдлөлөө илэрхийлж сургахад чухал байна" гэсэн юм. Харин Хар тамхи бодисоос иргэдийг хамгаалах нийгэмлэгийн тэргүүн Ш.Лхагвасүрэн "Хар тамхи хэрэглэдэг бүртгэлтэй хүмүүсээс гадна нууцаар хэрэглэгчдийн тоо олширсон. Тухайлбал өнгөрсөн онд ЦЕГ, сурагчдын зөвлөлтэй хамтарч 1067 хүүхдийн дунд судалгаа хийсэн. Ингэхэд 201 хүүхэд хар тамхи хэрэглэж үзсэн, үүнээас 61 нь давтан хэрэглэдэг гэсэн тоо гарсан" гэсэн юм.