“World Monuments Fund” сангаас дэлхийн 25 дурсгалт газрыг шалгаруулж, өчигдөр танилцууллаа.

Дэлхийн 250 гаруй дурсгалт газрууд өрсөлдсөнөөс Монголын Урлагийн Зөвлөлөөс дэвшүүлсэн Чойжин ламын сүм музей дэлхийн 25 дурсгалт газрын нэгээр тодорчээ. Улмаар дээрх сонгогдсон газруудын өвийг хамгаалах төсөл хэрэгжүүлэх юм байна.

Энэ сүмийг Монгол Улсын сүүлчийн эзэн хаан, шашин төрийг хослон баригч, нарангэрэлт, түмэннаст VIII Богд Жибзундамба хутагтын төрсөн дүү, Төрийн их Чойжин, хар зүгийн тэрсүүтний омгийг дарагч Лувсанхайдавт зориулж Их хүрээний нэрт уран барилгач Омбын удирдлага дор монгол урчуудын уран гараар бүтээжээ.

Чойжин ламын сүм музей таван сүм, хүндэтгэлийн таван хаалганаас бүрдэл болох бөгөөд Сүмийн бүх барилга асар маягийн эргэсэн дээвэртэй, тэр нь шаталсан дөрвөн хэсгээс бүрдэнэ. Түүнийг зааглан дагасан хянган хамар дээгүүр морь унасан эртний баатар, ан амьтан, араатан жигүүртэн зэрэг сүлжилдэн харагдах бөгөөд өнцгийн яс модны үзүүрт амьтны дүрс сийлсэн зэрэг нь цөм үлгэр домог, зөн билэгдлийн хэллэгтэй юм.