Үндсэн хуулийн цэцийн дарга Д.Одбаяр олон улсын хуралд оролцох гэж явахдаа ёс зүйн алдаа гаргажээ. Тухайн улсын хууль хяналтын байгууллагаас түүнийг нь эцэслэн тогтоосонгүй. БНСУ-ын Нисэхийн аюулгүй байдлын тухай хуулийг зөрчсөн гэж үзэн түүнд долоон сая вон буюу төгрөгт шилжүүлбэл 16 сая орчим төгрөгийн торгууль ногдуулж, 10 хоногийн хилийн хоригийг нь цуцлах шийдвэрийг тус улсын прокуророос гаргажээ. Тэрбээр эх орондоо өнөөдөр газардах тухай мэдээлэл зарим хэвлэлээр гараад байна. Гэхдээ энд хоёр асуулт байна.
Инчеоны цагдаагаас хэрэг бүртгэл нээж эхэлсэн өдрөөс эл хэрэг прокурорын хяналтад явсаар өнөөдрийг хүрч эцсийн шийдвэрээ гаргав.
Ахуйн чанартай зөрчлөөс даваагүй л бол цагдаагийн байгууллага өөрсдийн эрх үүргийн хүрээнд тухайн асуудлыг бүртгэж, торгууль ногдуулаад явах бүрэн үндэслэлтэй.
Харин орон нутгийн нутгийн шүүхийн шийдвэрийн хүрээнд Цэцийн дарга Д.Одбаярыг саатуулж, хилийн хориг тавьсан нь асуудлыг улам ээдрээтэй болгосон хэрэг. Ингэж явсаар эцэстээ Д.Одбаяр даргад иргэнийх нь хувиар торгууль ногдуулах шугамаар нэр холбогдсон гэх хэргийг нь ийн шийдвэрлэжээ.
Монголчуудын "Алганд багтдаг" Үндсэн хуулийнхаа тэргүүн манаачийн нэр холбогдсон асуудлыг хэрхэн хүлээж авсан, авах тухай энд бичих нь илүүц. Инчеоны хуулийн байгууллагын овоо хараанд “өртөх”-өөс эхлүүлээд саатуулан шалгах хүртэл нь түүнийг хангалттай гоочилсон, чичилсэн, хараан зүхсэн. Хуулийн сайд нь хүртэл “Настай ээжийг нь бод” хэмээн хэлснээс бус Д.Одбаяр шиг муу хүн Монголд байсангүй.
Гэхдээ... Цэцийн дарга Д.Одбаярыг КАL-ын онгоцоор зорчихдоо үйлчлэгчид нь бэлгийн дарамт үзүүлсэн, тусгаар улсын төрийн өндөр албан тушаалтны хувьд байж болохгүй үйлдэл хэмээн БНСУ-ын томоохон хэвлэлээр буруутгасныг цагдаагийн байгууллагаас нь Нисэхийн аюулгүй байдлын тухай хуулийг зөрчсөн гэж үзлээ. Өөрөөр хэлбэл, Цэцийн дарга гэхээсээ иргэн Д.Одбаярыг БНСУ-д хүчин төгөлдөр мөрдөгдөж байгаа хуулийг зөрчсөн гэж үзсэн нь энэ. KAL-ын онгоцоор зорчих үедээ гэмт хэрэг үйлдсэн биш зөрчил гаргасныг БНСУ-ын цагдаагийн байгууллага, прокуророос нь ийн тогтоосон бололтой. Ямар ч байсан Д.Одбаяр өөрт ногдуулсан торгуулиа төлөөд, эх орондоо ирэх нь цаг хугацааны асуудал.
Гагцхүү түүнийг ирэхэд эх орон, Монгол Улс, нийгэм нь өөрөө хэрхэн хүлээн авах бол гэдэг нь сонин. Зарим залуусын нэгдлээс ийм асуудалд орсон учраас өндөг шидэж, түүнийгээ баримтжуулан БНСУ-ын сошиал орчноор түгээнэ гэж байна.
Өөр нэгэн нь ирсэн даруйдаа албан тушаалаа өгөх тухай бичиж эхэллээ. Тийм ч байж болох. Хэн юугаа хийх нь, бусдыг чичилж шүүмжлэх нь Монгол Улсад нээлттэй. Үг хэлэх, үзэл бодлоо илэрхийлэх эрх чөлөөг эдлээд бид 30 гаруй жилийн нүүрийг үзэж байна. Хамгийн гол нь, Д.Одбаярыг БНСУ-ын Нисэхийн аюулгүй байдлын тухай хуулийг зөрчсөн гэж цагдаа, прокурорын байгууллагаас үзсэн асуудлыг бид өөрсдөө дахин шүүж, тогтоохоор болж байна нь. Хуулийн байгууллагаар уу, хувь хүний ёс зүйн асуудлаар уу гэдэг нь дараагийн сэдэв. Түүнээс бусдаар түүнийг чичилж, шүүмжилж, яллах нь одоохондоо эрт.
“Цэцийн гишүүнийг цэцийн зөвшөөрөлгүйгээр /түүнийг гэмт хэрэг үйлдэж байхад нь буюу хэргийн газарт гэмт үйлдлийнх нь нотлох баримттайгаар баривчилснаас бусад тохиолдолд/ баривчлах, албадан саатуулах буюу цагдан хорих, эрүүгийн хариуцлагад татах, эсхүл шүүхийн журмаар түүнд Зөрчлийн тухай хуульд заасан хариуцлага оногдуулах, орон байр, албан тасалгаа, биед нь үзлэг, нэгжлэг хийх, бичиг баримт, эд зүйлийг хураан авахыг хориглоно” хэмээх хуулийн заалт хэрэгжиж эхэлнэ. Хуультай, дүрэмтэй улсын хувьд түүгээрээ л шийднэ.
Харин Д.Одбаярын гаргасан зөрчлийг Монгол Улс, хууль хяналтын байгууллага нь хэрхэн хүлээж авах нь өөрөө сонирхолтой сэдэв. Учир нь, Д.Одбаяр Буянт-Ухаа нисэх онгоцны буудалд буусан өдрөөс түүнд БНСУ-ын бус Монгол Улсын хууль үйлчилнэ. Тэгэхээр хуулийн заалт болон хувь хүний ёс зүйтэй холбоотой асуудал энэ өдрүүдэд дахин хөврөх нь ээ. Харж л байя. Юу үнэн энэ л үнэн.
Г.Эрхэс
Сэтгэгдэл (71)