Сэлэнгэ аймаг дахь Цагдаагийн газрын Дулаанхан сумын хэсгийн төлөөлөгч Н.Сайнзаяа гал түймрийн аюулаас гурван хүний амь нас аварчээ. Эрдэнэт хүний алтан амийг аварсан түүнтэй цөөн хором ярилцлаа.

-Юуны өмнө танд энэ өдрийн мэндийг хүргэе. Та өөрийгөө товч танилцуулахгүй юу?

-Амрыг эрье. Би Сэлэнгэ аймаг дахь Цагдаагийн газрын Дулаанхан сумын хэсгийн төлөөлөгч ажилтай, цагдаагийн дэслэгч цолтой.

-Та нэг гэр бүлийн 3 гишүүний амь насыг аварч маш том гавъяа байгууллаа. Та тухайн үед юу болсон талаар бидэнд дэлгэрэнгүй мэдээлэл өгөхгүй юу?

-2019 оны арванхоёрдугаар сарын 4-нөөс 5-нд шилжих шөнийн 02.00 цагийн орчимд миний хариуцсан нутаг дэвсгэр болох Шаамар сумын 3 дугаар багийн нутаг Дулаанхан тосгонд “Айл шатаж байна” гэх дуудлага мэдээлэл ирсэн. Дуудлагын дагуу очиж шалгахад дөрвөн айлын орон сууц шатаж байсан. Ингээд тэнд байсан хүмүүсээс шатаж байгаа байшинд хүн байгаа талаар мэдээлэл авсан. Гал байшингийн гал тогооны хэсгээс гарч байсан. Би нөгөө өрөөнийх нь цонхыг хагалж, дотогш нэвтэрхэд гэрийн эзэд нь угаартсан байдалтай ухаангүй хэвтэж байсан. Ингээд эхэлж хамгийн ойр байсан гэрийн эзэгтэйг гаргаад, дараа нь гэрийн эзнийг татаж гаргасан. Дараа нь цаад өрөөнд байсан 2 ой 5 сартай охиныг мөн авч гарсан.

-Таны аварсан гэр бүлийн гишүүдийн эрүүл мэндийн байдал ямар байгаа вэ?

-Одоогоор гэрийн эзэн, охин хоёрын биеийн байдал хэвийн байгаа. Харин гэрийн эзэгтэй эмнэлэгт хэвтэн эмчлүүлж байгаа. Гэхдээ биеийн байдал нь сайн байгаа гэсэн.

-Иргэдийн амийг аварсны дараа таныг ухаан алдаж унасан гэсэн.

-Гал дунд ороход айх, сандрах зэрэгцэж байсан. Гэхдээ төрдөө өргөсөн тангарагтай цагдаагийн алба хаагч учраас ямар ч байсан хүмүүсийн амь насыг аврах ёстой гэсэн бодол төрдөг юм байна лээ. Ямар ч байсан өөрийн хийх ёстой үүргээ гүйцэтгэсний дараа ухаан алдаж унасан байсан. Одоо биеийн байдал хэвийн байна. Хэрэв байшин дотор ухаан алдсан бол миний амь нас ч эрсдэх аюултай байсан. Үүргээ нэр төртэйгээр биелүүлсэндээ баяртай байна.

-Өргөсөн тангарагтаа үнэнч байж үүргээ нэр төртэйгөөр биелүүлсэн танд дахин баяр хүргэе. Та цагдаагийн байгууллагад хэд дэх жилдээ ажиллаж байна вэ? Анх ажлын гараагаа хаанаас эхэлж байсан бэ?

-Баярлалаа. Цагдаагийн байгууллагад 12 дахь жилдээ ажиллаж байна. Ажлын гараагаа анх Сэлэнгэ аймгийн цагдаагийн газарт эргүүлийн цагдаагаар эхлүүлж байсан. 2017 онд цагдаагийн офицер бүрэлдэхүүнд орж, Дулаанхан сумын хэсгийн төлөөлөгчөөр томилогдон ажиллаж байна. Би эхнэр, хоёр хүүхдийн хамт Сэлэнгэ аймгийн Дулаанхан суманд ажиллаж, амьдардаг, Сэлэнгэ аймгийн уугуул.

-Цаг зав гарган ярилцсанд баярлалаа. Таны гэр бүлд болон цаашдын ажилд үйлсэд амжилт хүсэхийн зэрэгцээ ирж буй шинэ оны мэндийг давхар дэвшүүлье.

-Баярлалаа, та бүгдийн ч гэсэн ажил үйлсэд амжилт хүсье. Мөн шинэ оны мэнд хүргэе.

Б.Лхам