Засгийн газрын өчигдрийн хуралдаанаар төрийн албан хаагчдын цалинг найман хувиар нэмэгдүүлэхээс эхлээд нийтийн тээврийн шинэчлэлтэй холбоотой хэд хэдэн асуудлыг хэлэлцэн шийдвэрлэсэн билээ. Хуралдааны үеэр өөр нэгэн асуудлыг хэлэлцсэн нь зарим албан тушаалтныг үүрэгт ажлаас нь чөлөөлсөн байна.

Тодруулбал, Боловсрол, соёл, шинжлэх ухааны яамны Төрийн нарийн бичгийн дарга Б.Баярсайханыг  үүрэгт ажлаас нь чөлөөлөх шийдвэр гаргажээ. Энэ нь, Төрийн нарийн бичгийн дарга Б.Баярсайхан ажлаас чөлөөлөгдөх хүсэлтээ өөрөө гаргасантай холбоотой гэнэ. Б.Баярсайхан нь 2016 оны аравдугаар сард БСШУСЯ-ны Төрийн нарийн бичгийн даргаар томилогдон өдийг хүртэл ажиллаж байсан нэгэн.

Түүнийг 2017 оны долоодугаар сарын 18-ны өдрийн Засгийн газрын хуралдаанаар үүрэгт ажлаас нь халах шийдвэр гаргаж байсан удаатай.

Ингэхдээ төрийн албанд тэнцэхгүй, төрийн албан хаагчдыг мэргэжлийн удирдлагаар хангаж ажиллаж чадаагүй зэрэг үндэслэлээр үүрэгт ажлаас нь чөлөөлсөн байдаг. Тэрбээр тухайн үед "Миний хувьд хууль зөрчсөн ямар ч үйл ажиллагаа явуулаагүй учир нүүр бардам байна. Боловсролын салбарт мөнгөгүйгээр ч зөвхөн зохион байгуулалтын чанартайгаар олон өөрчлөлт хийх боломжтой. Гэтэл энэ бүхнийг мөнгөний ашиг сонирхлоор харсан хэсэг хүний л явуулга боллоо. Би цаашид хандах ёстой газарт нь хандах болно. Төрийн алба гэдэг хуультай. Тэгэхээр хуулийн дагуу л асуудлыг шийдэх ёстой" хэмээн ярьж өөрийн байр сууриа илэрхийлж байсан билээ.

Улмаар Б.Баярсайхан Засгийн газрын дээрх шийдвэрийг эсэргүүцэж, шүүхэд хандсан байдаг. Харин шүүх хурал нь өнгөрсөн оны наймдугаар сард Б.Баярсайханы гомдлыг хэлэлцэж, түүний талд шийдвэрээ гаргасан төдийгүй Захиргааны хэргийн давж заалдах шүүх ч анхан шатны шүүхийн шийдвэрийг хэвээр үлдээсэн юм. Захиргааны хэргийн анхан болон давж заалдах шатны шүүхийн шийдвэрийг Засгийн газар хүлээн зөвшөөрөхөөс татгалзаж Улсын Дээд шүүхэд хандсан.

Харин 2018 оны тавдугаар сарын 28-нд Улсын дээд шүүх Боловсрол, соёл, шинжлэх ухаан, спортын яамны Төрийн нарийн бичгийн дарга асан Б.Баярсайхан болон Засгийн газар хоорондын хүсэлт, гомдлыг хүлээн авч шийдвэрээ гаргасан.

Шүүх бүрэлдэхүүн давж заалдах шатны шүүхийн магадлалыг хэвээр үлдээсэн юм. Өөрөөр хэлбэл, Улсын дээд шүүх шийдвэрээ Б.Баярсайханы талд гаргаж, Захиргааны хэргийн анхан болон давж заалдах шатны шүүхийн шийдвэрийг хэвээр үлдээсэн гэж ойлгож болно. Түүнчлэн өнгөрсөн хугацаанд ажилгүй байсан цалин, хөлсийг нь гаргуулахаар болсон байдаг. Ингэснээр Б.Баярсайхан шүүхэд заргаа авч, Төрийн нарийн бичгийн даргаар ажиллах эрх зүйн орчин бүрдсэн билээ.  Удалгүй Засгийн газрын ээлжит хуралдаанаар уг асуудлыг хэлэлцэх үеэрээ Б.Баярсайханыг ажилд нь эгүүлэн томилохоор болсон юм.

С.Сүлд