НОБГ, НМХГ-аас сайжруулсан түлштэй холбоотой асуудлаар мэдээлэл хийлээ.

НОБГ-ын Гамшгаас урьдчилан сэргийлэх хэлтсийн дарга Г.Нэргүй “Энэ сарын 25-нд яаралтай түргэн тусламжийн төвд угаарын хийнд хүнд, хөнгөн хэлбэрээр хордсон зургаан өрхийн 13 иргэн хандаж, эмнэлгийн тусламж үйлчилгээ авсан байна. Эмнэлэгт гурван том хүн, нэг хүүхэд хэвтэн эмчлүүлж байгаа мэдээлэл байна. Ерөнхий сайдын захирамжийн дагуу туулах чадвар бүхий 28 автомашин өчигдрөөс эхэлж түлшний тээвэрлэлт, түгээлтийг сайжруулах зорилгоор өндөрлөг цэгүүдэд үйлчилж байна. Эдгээр алба хаагчид 24 цагаар ажиллаж байна. Мөн НОБГ, НМХГ, нийслэлийн Цагдаагийн газраас сайжруулсан түлшний 386 цэгт хяналт хийж ажиллаж байна. Давхардсан тоогоор 20 орчим мянган хүн 24 цагаар “утаагүй Улаанбаатар”-ыг хангуулахын тулд ажиллаж байна.

НМХГ-ын дэд дарга С.Даваасүрэн “Тавантолгой түлш дээр байнгын хяналт тавин ажиллаж байна. Өдөрт хоёр улсын байцаагч ажилладаг. Мөн тус компанийн арваннэгдүгээр сард үйлдвэрлэгдсэн түлшнээс авсан дээжийн хариу гарч дүгнэлтийг Тавантолгой түлшид хүргүүлсэн. Шинжилгээгээр стандартын шаардлага хангаж байна гэж гарсан.

Барьцалдуулагч болон түүхий эд нэмж ирсэн тохиолдолд бүтээгдэхүүнээс дээж авч шинжилж байна. Цаашид ч байнгын шинжилгээ, хяналтыг хийж ажиллана. Түүхий нүүрсний хэрэглээтэй холбогдуулан найман товчоонд 180 төрийн алба хаагч 24 цагаар ажиллаж байна. Энэ сарын 25-ны өдрийн байдлаар түүхий 25 шуудай түүхий нүүрс нэвтрүүлэхээр завдсаныг илрүүлэн автомашиныг хураан авч, нүүрсийг Амгалан дулааны цахилгаан станцад хүргүүлсэн. Мөн энэ сарын 24-ний өдөр Налайх дүүргээс дөрвөн тонн түүхий нүүрс оруулж ирэхийг завдсан. Тиймээс өөрсдийн хөрөнгө мөнгөөрөө хохирохгүй байх”-ыг анхаарууллаа.

Б.Лхам