Оюун ухаан, урлаг, авьяас чадвараараа улс, эх орныхоо нэрийг гаргасан 2019 оны онцлох 35 хүүхдийг Ерөнхий сайд хүлээн авч уулзан, талархал илэрхийлэн шагналаа. Энэ удаагийн шагналын гол онцлого нь усанд живж байсан дөрвөн хүүхдийн амийг аварч хамгаалсан сурагчдыг оны онцлох хүүхдээр шалгаруулсан явдал байлаа.  

Ерөнхий сайд У.Хүрэлсүх энэ үеэр “Монгол Улсынхаа нэрийг тив дэлхийд алдаршуулж, оюун ухаан, авьяас чадвар, спорт, түүх соёлоо дэлхийлд таниулж,  амжилт гаргасан болон эр зориг гаргаж, бусдын амь насыг аварсан хүүхдүүддээ халуун талархал илэрхийлж, шинэ оны мэнд хүргэе. 28 дахь жилдээ зохион байгуулж байгаа оны есөн номинацид 35 хүүхэд, хоёр баг хамт олон шалгарлаа.

Хүүхэд та бүхэн зөв хүмүүжилтэй хүн болж төлөвшиж байгаад баяртай байна.

Манай улсын нийт хүн амын 36 хувийг 15 хүртэлх насны хүүхэд эзэлдэг. Тийм ч учраас хүүхдийн хөгжил оролцоог дэмжих, тэднийг хөгжүүлэх чиглэлээр бодлого барин ажиллаж байна. Тухайлбал, хүүхдийн зуслан, Хүүхдийн ордон зэрэгт хамрагдсан хүүхдийн тоо өмнөх оноос өссөн үзүүлэлттэй байна.

Эрхэм дүү нартаа хандаж хэлэхэд эх хэлээрээ зөв ярьж, түүх соёл өв уламжлалаа хайрлан хамгаалж, дэлхийд өрсөлдөх чадвартай, бүтээлч шударга хүн болж өсөхийг хүсч байна. Та бүгдийг ээж аав, сурган хүмүүжүүлэгч багш нарт нь талархал илэрхийлье. Дүү нартаа хамгийн сайн сайхан бүхнийг хүсэн ерөөе” гэлээ.  

Оны шилдэг хүүхдээр шалгарсан есдүгээр ангийн сурагч Н.Наранбат “Энэ онд гар бөмбөг, хөл бөмбөгөөр хичээллэж багаараа амжилт гаргалаа. Мөн манай анги шилдэг ангиар шалгарсанд ангийн багш, найзууддаа талархал илэрхийлж, энэ ташрамд баяр хүргэмээр байна. Анги хамт олондоо баярлалаа” гэсэн юм.

Нийслэлийн аравдугаар ангийн сурагч А.Аззаяа “Энэ онд 3000 хуурчдын наадамд амжилттай оролцсон. Мөн 9-12 ангийн сурагчдын дунд техник технологийн ур чадварын тэмцээнийг Хүүхэд, гэр бүл, залуучуудын төвтэй хамтран амжилттай зохион байгуулсан. Оны онцлох хүүхэд болсондоо баяртай байна” гэв.

Б.Лхам