Нийтийн хэв журам хамгаалах, олон нийтийн аюулгүй байдлыг хангах албаны Хүрээлэн буй орчны хяналтын хэлтэс, Эргүүл хамгаалалтын газрын алба хаагчид Засгийн газрын 62 дугаар тогтоолын хэрэгжилтийг хангаж “Агаарын чанарыг сайжруулах бүс”-д нэвтрэх хяналтын цэгт 24 цагийн үүрэг гүйцэтгэж, хяналт шалгалтыг тасралтгүй зохион байгуулж байна.

Иргэд, аж ахуйн нэгж байгууллагууд түүхий нүүрс хууль бусаар зохих зөвшөөрөлгүй “Агаарын чанарыг сайжруулах бүс”-д нэвтрүүлэхийг завдаж байгаа зөрчил буурахгүй байна. Тухайлбал, энэ сарын 24-25-ны өдрүүдэд Агаарын чанарыг сайжруулах бүсэд зөвшөөрөлгүй түүхий нүүрс нэвтрүүлэхийг завдсан 5 зөрчил илрүүлж Нийслэлийн Засаг даргын А/1118 дугаар захирамжийн дагуу 5 тээврийн хэрэгслийг тээврийн хэрэгслийг түр саатуулах байранд саатуулж, 6 тонн нүүрсийг хураан авч, Монгол Улсын Зөрчлийн тухай хуулиар арга хэмжээ тооцуулахаар Нийслэлийн Мэргэжлийн хяналтын газарт материалыг хүргүүлж ажиллалаа.

Монгол Улсын “Агаарын тухай хууль” зөрчсөн тохиолдолд Нийслэлийн Засаг даргын А/1118 дугаар захирамжийн дагуу зөрчил үйлдэхэд ашигласан тээврийн хэрэгслийг тээврийн хэрэгслийг түр саатуулах байранд саатуулж, түүхий нүүрсийг хураан авч, Монгол улсын “Зөрчлийн тухай хууль”-ийн 7.4 дүгээр зүйлийн 1.3 дахь хэсэгт зааснаар хүнийг гурван зуун нэгжтэй тэнцэх хэмжээний төгрөгөөр, хуулийн этгээдийг гурван мянган нэгжтэй тэнцэх хэмжээний төгрөгөөр торгох шийтгэл ногдуулна.