Ерөнхий сайд У.Хүрэлсүх 2019 оны “Онцлох хүүхэд”-ийг өчигдөр хүлээн авч талархал илэрхийлэн, шагнасан билээ. Энэ оны хувьд 35 сурагч авьяас чадвар, сурлаг хөдөлмөрөөрөө үеийн нөхдөө манлайлж, шилдэгээр шалгарсан юм. Эдгээр шилдэг хүүхдийн төлөөлөл болох  Дорнод аймгийн сурагчид Хэрлэн голд живж байсан дөрвөн охиныг аварч оны шилдгүүдийн нэгд багтсан нь олны талархлыг хүлээгээд байна. Энэ талаар Дорнод аймгийн сурагч С.Мөнхсүлдтэй хэсэгхэн хором ярилцсанаа хүргэе.

 -Оны шилдэг хүүхдээр шалгарсанд баяр хүргэе?

-Баярлалаа. Оны онцлох хүүхдээр тодорно гэж бодсонгүй. Баяртай байна.

-Юун түрүүнд өөрийгөө товч танилцуулахгүй юу?

-Би Дорнод аймгийн Хэрлэн сумын ерөнхий боловсролын I сургуулийн 11а ангид суралцдаг. Эмээ, дүү, ээжтэй хамт амьдардаг.

-Оны шилдгийг ямар шалгуураар тодруулдаг юм бэ. Мэдээж аймгийн хэмжээнд шалгаруулалт явдаг байх?

-Оны шилдэг хүүхдэд тив дэлхийд амжилт гаргасан, түүх соёл, урлагаа сурталчилсан, авьяас чадвараараа манлайлсан зэрэг хүүхдийг тодруулсан. Бидний хувьд хүмүүнлэгийн ажил хийсэн гэх утгаар Дорнод аймаг дахь Гэр бүл, хүүхэд, залуучуудын төвөөс оны шилдэг хүүхдэд тодорхойлсон.

-Тухайн өдөр яг юу болсон юм бэ?

-Өнгөрсөн тавдугаар сарын 23-нд болсон үйл явдал юм. Тухайн өдөр их халуун байсан учраас бид найзуудаараа  явж юм. Хэрлэн гол руу орох гээд явж байтал урд хүн живж байгаа юм шиг харагдсан. Би хүн живж байна гээд Т.Дөлгөөн, А.Тэмүүжин н.Амарсанаад заасан юм. Ингэж хэлээд сайн тогтоод хартал нэг ч биш бүр дөрвөн хүн живж байсан. Зарим нь далд орсон байдалтай гар нь сарвайх л харагдсан.  Санаандгүй байдлаар тэдгээр сурагчдыг аварсан. Дийлэх болов уу, яах бол ч гэж бодоогүй. Шууд л ус руу хар хурдаараа орсон.

-Живж байсан охидын биеийн байдал ямар байгаа вэ?

-Уснаас гаргасны дараа холбогдох хүмүүс эмнэлгийн тусламж үзүүлсэн. Охид зургадугаар ангийн сурагчид байсан. Одоо хүүхдүүдийн бие сайн байгаа. Тухайн үед Хэрлэн голын ус нэлээд гүн байсан юм.

-Хүүхдүүд живж байхыг хараад айж, сандраагүй юу?

-Маш их айж, сандарч байсан. Аваръя л гэж бодсон. Түүнээс биш өөрсдөө эрсдэх болов уу гэж огт бодоогүй.

-Та бүгд усанд сэлж чаддаг байсан уу?

-Дээр хэлсэнчлэн тухайн үед усны түвшин их нэмэгдсэн байсан. Ойролцоогоор хоёр метр гаруй байсан байх. Манай аймаг голтойгоо ойрхон учраас ихэвчлэн хүүхэд бүр л багаасаа сэлж сурдаг. Энэ нь давуу тал болсон байх. 

-Чөлөөт цагаа хэрхэн өнгөрүүлдэг вэ. Чөлөөт цагаа өнгөрүүлэх газар байдаг уу?

-Хүүхдүүд ихэвчлэн спорт заал авч тоглох маягаар л чөлөөт цагаа өнгөрүүлдөг. Өөр очоод тоглох, чөлөөт цагаа өнгөрүүлэх газар байдаггүй. Тиймээс хүүхэд, залуусын чөлөөт цагийг зөв боловсон өнгөрүүлэх спорт цогцолбор ч юм уу хэрэгтэй гэж боддог.

- Т.Дөлгөөн, А.Тэмүүжин та бүгдийн хувьд хэдэн жил нөхөрлөж байна вэ?

-Бид нэг ангийн хүүхдүүд учраас багаасаа найзалсан.

-Мэргэжлээ сонгосон уу?

-Барилгын инженер болно гэж боддог. Тийм ч учраас физик зэрэг энэ төрлийн хичээлдээ илүү шамдаж байгаа. 12 дугаар ангиа сайн төгсөж, хүссэн мэргэжлээ сонгохыг л зорьж байна.

-Танай сургуулийн хувьд хүүхдүүдийг хөгжүүлэх ямар ямар секц, дугуйлан байдаг вэ. Хүртээмжтэй байж чадаж байна уу?

-Хүүхэд бүрийн сонирхол, хийж чаддаг зүйл өөр өөр учраас секц, дугуйлангийн хувьд хүртээмжтэй байж чаддаг гэж боддог. Тухайлбал, хөгжим тоглох дуртай хүүхдүүдэд зориулсан төрөл бүрийн хөгжим, спортын дугуйлан мөн хичээл төрлийн гээд олон дугуйлан хичээллэдэг юм.

Б.Лхам