Нийслэлчүүдийг унтаж байхад л харанхуй шөнөөр ажилдаа гардаг хүмүүс бол ТҮК-ийн ажилчид. Тэд баяр ёслол, амралтын өдөр ч, бүр цасан шуурга, аадар борооноор ч  нийслэлийг цэвэр цэмцгэр байлгахын төлөө завгүй ажилладаг. Хариуцсан ажилдаа хариуцлагатай ханддаг хөдөлмөрч ТҮК-ийнхэнд сар шинийн баярын өмнө залуус хүндэтгэл үзүүлдэг уламжлал тогтоод 10 гаруй жил болж буй.

Уламжлал болон тогтоод буй “Сэтгэлийн дулаан бэлэглэе” үйл ажиллагааг зохион байгуулдаг төрийн бус байгууллагын болон сайн дурын залуус ѳѳрсдийн бэлтгэсэн чанасан адууны мах, халуун аарц, аньс, чацарганаар их хотын шар хантаазтай, хөдөлмөрч иргэдээ өнөөдөр өглөө дайлахаар болжээ. “Сэтгэлийн дулаан бэлэглэе” үйл ажиллагаанд нэгдэж, бусдын сэтгэлд илч бэлэглэхийг хүссэн хэнд ч үүд хаалга нээлттэй гэдгийг зохион байгуулагчид онцолж байна. Нийслэлийн хэмжээнд 1000 орчим ТҮК, зам талбайн ажилчин байдаг бөгөөд тэдний ажил 06.00 цагт эхэлдэг байна.

Г.Эрдэнэ