Монгол Улсын түүхэнд анх удаа Эмпати салбар сургуулиуд болон Улаанбаатар Элит Олон Улсын сургууль хамтран энэ сарын 12-оос 26-ны хооронд Энэтхэг улсын Пагвара хотын Кэмбриж Олон улсын сургуультай сурагч солилцох хөтөлбөр зохион байгуулах гэж байна.
Энэтхэг улсаас Монгол Улсад суугаа Онц бөгөөд Бүрэн Эрхэт Элчин Сайд ноён М.П.Сингийн тусламж дэмжлэгийн хүрээнд энэхүү томоохон боловсролын хөтөлбөр биеллээ олжээ. Энэхүү айлчлал нь Энэтхэг Монголын хооронд дипломат харилцаа тогтоосны 65 жилийн ойг тэмдэглэх хүрээнд зохион байгуулагдаж байгаа ба айлчлалын үр дүнд нөхөрсөг харилцаа бүхий тус хоёр орны залуу үеийнхний хооронд зөв харилцааг хөхүүлэн дэмжих юм. Сурагчид хичээлд сууж, соёл, урлаг болон хичээлээс гадуур үйл ажиллагаануудад хамрагдахаас гадна Амритсар хотын Алтан Сүм, Агра хотын Таж Махал, Шинэ Дели хотын Улаан боомт болон бусад дурсгалт газруудаар зочлох аж.
Улаанбаатар Эмпати Сургууль, Орхон Эмпати Сургууль, Дархан Эмпати Сургууль болон Баян-Өлгий Эмпати Сургууль, Улаанбаатар Элит Олон Улсын сургуулийн 21 орчим сурагч гурван багшийн хамт тус хөтөлбөрт хамрагдана. Тус хөтөлбөрийн зохион байгуулагч ноён Бенедикт Эдвард нь Энэтхэг улс дахь хамтрагч сургуультай тогтмол холбогдох, сурагчдад визний анкет бөглөхөд туслах, нээлтийн арга хэмжээ зэрэг зохион байгуулалтын ажлуудыг хариуцан ажиллаж байна. Эмпати Ертөнц ХХК-ийн ерөнхий захирал Б.Ганбат, Үйл ажиллагаа хариуцсан захирал Б.Хангай, Санхүү хариуцсан захирал М.Жансая нар тус Сурагч Солилцооны Хөтөлбөрийг байнга дэмжиж ирснээс гадна ойрын үед Багш Солилцох Хөтөлбөр зохион байгуулах боломжийг судалж байгаа аж.
Хөтөлбөрийг нээх ёслолын арга хэмжээг өнөөдөр зохион байгуулах юм байна.
