Цаг уур, орчны шинжилгээний газраас 2020 оны нэгдүгээр сарын 2-ны өдөр гаргасан зудын эрсдлийн зургаар нийт найман аймаг зудын нэн өндөр эрсдэлтэй гэж үнэлэгдсэн учир дээрх аймгийн 1000 малчин өрхөд мөнгөн тусламж үзүүлэх болсноо Монголын Улаанзагалмай нийгэмлэгээс мэдэгдлээ. Тодруулбал, Өвөрхангай, Архангай, Ховд, Говь-Алтай, Дундговь, Булган, Сүхбаатар, Хэнтий аймгийн 1000 малчин өрх бүрт 240 мянган төгрөгийн бэлэн мөнгөн тусламж болон эрдэс тэжээлийн багцыг бэлтгэл ажлаа хангаж эхэлсэн аж.
Тус нийгэмлэгийн хувьд Цаг уур, орчны шинжилгээний газрын мэдээгээр гурав ба түүнээс дээш аймгийн нийт нутаг дэвсгэрийн 20-оос дээш хувь нь зудын нэн өндөр эрсдэлтэй гэж гарвал хариу арга хэмжээ авч эхэлдэг байна. Энэ жилийн хувьд найман аймаг зудын нэн өндөр эрсдэлтэй гэж үнэлэгдсэн учир эдгээр аймгийн өрхөд туслахаар болжээ. Бэлэн мөнгөөр туслах болсон шалтгаан нь тээвэрлэлтийн зардал шаардахгүй, иргэд шаардлагатай зүйлдээ зарцуулах боломж өндөр учраас ийн сонголт хийсэн байна.
Тусламж үзүүлэх өрхийг сонгохдоо тухайн аймгийн Онцгой байдлын газар, Улаан загалмай хороо хамтарч ажиллах бөгөөд голлох шалгуурын хувьд,
- 16 хүртэлх насны гурваас дээш хүүхэдтэй өрх толгойлсон эцэг, эсвэл эх;
- 60-аас дээш насны буюу харж хандах хүнгүй өндөр настан;
- Хөгжлийн бэрхшээлтэй иргэнтэй гэр бүл;
- 16-аас доош насны таваас дээш хүүхэдтэй гэр бүлийг сонгох бөгөөд ингэхдээ малын тоо толгой нь 200 хүртэл байх ёстой юм байна.
Монголын Улаанзагалмай нийгэмлэгээс тусламжийн бэлэн мөнгөнийг "Хаан" банкаар дамжуулах бөгөөд тэдэнтэй хамтарч малчдад туслах хүсэлтийг иргэдийн хүсэлтийг талархан хүлээж авна гэдгээ мэдэгдлээ.
Сэтгэгдэл (1)