Үндэсний статистикийн хорооноос өнгөрсөн оны нийгэм, эдийн засгийн байдлаар танилцууллаа.
Тухайлбал, боловсролын салбарт улсын хэмжээнд 2019/2020 оны хичээлийн жилийн эхэнд 1439 цэцэрлэг үйл ажиллагаа явуулж байгаагийн 910 буюу 63.2 хувь нь төрийн өмчийнх, 529 буюу 36.8 хувь нь хувийн өмчийнх байна. Харин 2019/2020 оны хичээлийн жилд нийт 95 их, дээд сургууль, коллеж үйл ажиллагаа явуулж байгаагийн 19 нь төрийн өмчийн, 76 нь хувийн өмчийн сургууль байгаа аж.
Улсын хэмжээнд 2019/2020 оны хичээлийн жилийн эхэнд СӨБ-д нийт 263.3 мянган хүүхэд хамрагдаж байгаагийн 225.0 мянга нь төрийн өмчийн цэцэрлэгт, 38.3 мянга нь хувийн өмчийн цэцэрлэгт хамрагдаж байна. Мөн ерөнхий боловсролын сургуульд 640.4 мянган сурагч суралцаж байгаагийн 593.4 мянга нь төрийн өмчийн, 47.0 мянга нь хувийн өмчийн сургуульд тус тус суралцаж байна.
Мөн 2019/2020 оны хичээлийн жилийн эхэнд 1439 цэцэрлэгт 263.3 мянган хүүхэд хамрагдаж байгаа нь өмнөх оны хичээлийн жилээс 2000-аар, ерөнхий боловсролын 820 сургуульд 640.4 мянган сурагч суралцаж байгаа нь өмнөх хичээлийн жилээс 47.3 мянгаар тус тус нэмэгджээ.
Их, дээд сургууль, коллежид 148.4 мянган оюутан суралцаж байгаа нь өмнөх оноос 9.2 мянгаар буурчээ. Суралцагчид өмнөх хичээлийн жилээс буурсан нь 2019/2020 оны хичээлийн жилд их, дээд сургуульд элсэгчид 17.6 мянга болж, өмнөх хичээлийн жилээс 26.5 мянгаар буурсантай холбоотой юм. Их, дээд сургууль, коллежид суралцагчдын 119.2 мянга нь бакалаврын түвшний сургалтанд хамрагдаж байна.
Их, дээд сургууль, коллежид суралцагчдыг суралцаж буй мэргэжлийн чиглэлээр авч үзвэл, 2019/2020 оны хичээлийн жилд нийт суралцагчдын 22.0 хувь нь худалдаа, бизнесийн удирдлагын, 15.4 хувь нь багш, боловсрол судлал, сурган хүмүүжүүлэх, 14.1 хувь нь анагаах ухааны, 9.1 хувь нь инженерийн чиглэлээр тус тус суралцаж байна.