Сонгинохайрхан дүүрэг дэх "Эмээлт" авто тээврийн товчоогоор Ховд аймгаас Улаанбаатар чиглэлд зорчиж явсан 12-50 ХОА улсын дугаартай автомашинд 2017 оноос эхлэн таван жилийн хугацаанд түүж бэлтгэхийг хориглосон Алтайн барагшун тээвэрлэж явсан хэргийг илрүүлжээ. Хэргийг Сонгинохайрхан дүүргийн цагдаагийн нэгдүгээр хэлтэст шалгаж байгаа бөгөөд шалгалтаар 20 гаруй тонн барагшун тээвэрлэж явсан нь илэрсэн аж.
Барагшун нь Монгол орон төдийгүй дэлхийн олон оронд түгсэн уламжлалт эмчилгээний ховор төрлийн бүтээгдэхүүн юм. Энэхүү эмийн ховор, чухал түүхий эд далайн түвшнээс 2500-4300 метрийн өндөрт байдаг хар хүрэн, тослог өвөрмөц үнэртэй ургамал бөгөөд хадны ан цав болон түүний гадаргаас нарны элчинд халж, шүүрэн гардаг байгалийн идэвхтэй шимт бүтээгдэхүүн юм байна.