Шинэ төрлийн коронавирустэй холбоотой асуудлаар Эрүүл мэндийн яамнаас мэдээлэл хийлээ.
ДЭМБ-ын Суурин төлөөлөгч Сергей Диордица "Өнөөдөр ДЭМБ-ын удирдах албаныхан Си Жиньпинтэй уулзаж, Ухань хотод халдварын тархалтыг хязгаарлах, вакцин гаргаж авах талаар хэлэлцлээ. Одоогийн байдлаар элхий дахинаа шинэ төрлийн коронавирусийн халдвараар өвчилсөн хүний тоо 4593, сэжигтэй тохиолдол 6973 байна. Халдвар авсан 132 хүн нас барсан. БНХАУ-аас гадна дэлхийд дөрвөн бүсийн 14 улсад 56 тохиолдол батлагдсан байна. Үүнээс 42 тохиолдол нь Ухань хотод зорчсон өгүүлэмжтэй байна. Энэ нь БНХАУ-аас бусад оронд дэгдэлт хэлбэрээр тархалт явагдахгүй байгааг илтгэж байна. Тохиолдлын ихэнх нь эрэгтэйчүүд байгаа бөгөөд нас барсан тохиолдын ихэнх нь архаг өвчтэй байна. Гэхдээ энэхүү үзүүлэлт нь 2003 онд гарсан SARS-н дэгдэлттэй харьцуулахад харьцангүй бага байгаа юм.
Түүнчлэн бас нэгэн асуудлыг тодруулж хэлэхэд, энэхүү өвчлөлтэй холбоотой ташаа мэдээлэл нийгэмд их тархаж байгаа учраас хэвлэл мэдээллийн байгууллагуудыг албан ёсны буюу ДЭМБ болон салбарын яамнаас мэдээлэл авахыг уриалж байна.
Эцэст нь нэгдүгээр сарын 22-ноос хойш өөрчлөлт ороогүй ч өдөр тутмын мэдээллээр дэлхийн хэмжээний эрсдлийг дунд гэж ДЭМБ-ын ташаа мэдээлэл оруулсанд хүлцэл өчиж байна" гэлээ.
Төрийн захиргааны удирдлагын газрын дарга Б.Цогтбаатар "БНХАУ-ын Эрүүл мэндийн яамнаас авсан мэдээлэл буюу өнөөдрийн байдлаар өвчилсөн хүний тоо 5974, нас барсан хүний тоо 132, сэжигтэй тохиолдлын үзүүлэлт 9239 байна. Мөн бүрэн эдгэрсэн 103 иргэн эмнэлгээс гарчээ. Түүнчлэн дэлхийн 16 оронд 56 батлагдсан тохиолдол бүртгэгдсэн. Харин 20 оронд сэжигтэй тохиолдол бүртгэгдээд байна. Манай улсын тухайд, өнөөдрийн байдлаар коронавирусийн халдвар бүртгэгдээгүй. Харин тандалтын 4 долоо хонгийн мэдээгээр амьсгалын замын өвчин амбулаторийн үзлэгийн 12.9 хувийг эзэлж байна.
Одоогоор коронавирусийн сэжигтэй 13 хүнийг тусгаарлаад байгаа. БНХАУ-аас ирсэн буюу халуурсан тохиолдлуудыг тусгаарлаж, шинжилгээ авч байгаа бөгөөд өнөөдрийн байдлаар 14 хүний онош үгүйсгэгдсэн. Одоогоор 18 хүний шинжилгээ хийгдэж байна. Холбогдох журмын дагуу тандалт хяналт хийхэд сэжигтэй зүйл байхгүй байгаа. Түүнчлэн энэ сарын 28-ны байдлаар 6 аймгийн 8 хилийн боомтоор нийт 1966 Монгол Улсын иргэн нэвтэрсэн мэдээлэл байна. Тиймээс холбогдох журам дүрмийн дагуу танадалт, судалгаа хийгдсэн болохыг албан ёсоор мэдэгдэж байна" гэв.
Хэнтий аймгийн Эмнэлгийн тусламжийн газрын дарга Я.Буянжаргал "Хэнтий аймагт 14 настай охин нэгдүгээр сарын 24-нөөс эхэлж халуурч, 27-ны өдөр тус аймгийн нэгдсэн эмнэлэгт хэвтсэн ч нас барсан тохиолдол бий. Үүний шинжилгээний хариу өчигдөр гарлаа. Бид шинжилгээ хийхдээ өмнө байсан 21 вирусийг илрүүлэх шинжилгээ болон коронавирусийг илрүүлэх тестүүдийг тавьсан бөгөөд хариугаар А хүрээний H3N2 вирусийн халтгалгааны хүндэрлээс болж нас барсан нь тогтоогдсон” гэсэн юм.
