Шинэ төрлийн коронавирусын халдварын талаар Эрүүл мэндийн яамнаас мэдээлэл хийлээ.

ЭМЯ “Манай улс коронавирусын эрсдэлтэй бүлэгт орж байгаа. Учир нь сүүлийн 14 хоногт хилийн боомтуудаар орж ирэх монгол иргэдийн тоо эрс нэмэгдэж байна. Эдгээр иргэд дундаас халуурсан зэрэг сэжигтэй тохиолдол их байна. Мөн коронавирусын талаар мэдээлэл гарсан, халдварын өндөр эрсдэлтэй энэ үед Дархан-Уул аймгийн иргэн гадаад орноор зорчсон байна. Улмаар эх орондоо ирээд халуурсан шинж тэмдэг илэрч байгаа. Тиймээс иргэдийн зүгээс анхаарал, болгоомжтой байх хэрэгтэй. Тиймээс өвчлөл гарсан ул орнууд руу зорчихгүй байх, зорчсон тохиолдолд өөрийгөө тусгаарлах, эрүүл мэндийн байгууллагад хандах шаардлагатай гэдгийг зөвлөж байна” гэлээ.  

ДЭМБ-ийн мэргэжилтэн О.Ариунтуяа “ДЭМБ-ын энэ сарын 4-нд гаргасан мэдээллээр 20630 батлагдсан тохиолдол бүртгэгдсэнээс 420 нь нас барсан байна. нас баралтын түвшин 2.1 хувьтай тэнцүү хэвээр байна. Нийт тохиолдлын 99 хувь нь БНХАУ-д гарсан. Мөн одоогийн байдлаар 23 улсад 150 тохиолдол гарсан. Түүнчлэн БНСУ, Малайз, Герман зэрэг улсад дөрвөн тохиолдол шинээр илэрсэн. Өвчлөл эрэгтэйчүүдэд дийлэнхдээ тохиолдож байна. Нууц үе дунджаар 6.1 хоног байна” гэдгийг хэллээ.

ОБЕГ-ын Гамшгийн шуурхай удирдлагын газрын Эрүүл мэнд, сэтгэл зүйн тасгийн дарга, хошууч Д.Хонгор “Халдвартай холбогдуулан улсын онцгой комисс хоёр удаа хуралдсан. Холбогдох байгууллагуудад үүрэг өгөн ажиллаж байна. ОБЕГ-ын даргын тушаалаар шуурхай ажлын хэсэг байгуулагдсан. Энэ нь холбогдох байгууллагуудтай мэдээ мэдээлэл дамжуулан ажиллаж байна”.

ХӨСҮТ-ийн ерөнхий захирал Д.Нямхүү “Энэ сарын 3-нд тусгаарлагдсан нэг сэжигтэй тохиолдол гарсан. Шинжилгээний хариугаар илрээгүй. Мөн энэ сарын 2-нд Дархан-Уул аймагт сэжигтэй нэг тохиолдол гарч, тусгаарлагдсан байна. ЭНэ сарын 4-нд Сөүл-Улаанбаатарын чиглэлээр хоёр сэжигтэй тохиолдол ирснийг тусгаарлаад байна. Шинжилгээний хариу маргааш гарна” гэлээ.

МХЕГ-ын Эрүүл мэндийн хяналтын хэлтсийн дарга Д.Баярболд “Вирусын халдварын дэгдэлтэй холбогдуулан МХЕГ-аас хэд хэдэн арга хэмжээ зохион байгуулагдан ажиллаж байна. Мэргэжлийн хяналтын газраас өндөржүүлсэн бэлэн байдалд ажиллаж байна. Энэ хүрээнд 21 аймаг, нийслэлийн дүүргүүдэд эрүүл ахуйн байдлыг хангуулахаар ажиллаж байна. Тухайлбал, нийтийн тээврийн 12, такси үйлчилгээний таван компани, нийслэлд үйл ажиллагаа явуулдаг 47 эмнэлэг, ерөнхий боловсролын 197 сургууль, 457 цэцэрлэг, 52 их, дээд сургууль, 57 мэргэжил дээшлүүлэх сургалт үйлдвэрлэлийн төв, 76 зочид буудал, 303 хүнсний чиглэлээр үйл ажиллагаа явуулдаг аж ахуйн нэгжид шаардлага өгсөн. Ерөнхий боловсролын сургуулийн үйл ажиллагааг зогсоосонтой холбогдуулан хоёр сургалтын төв үйл ажиллагаа явуулж байсан зөрчил илэрсэн. Зөрчлийг арилгуулж, үйл ажиллагааг зогсоолоо. Мөн хариуцлага алдсан нэг байгууллагад торгох арга хэмжээ авч ажиллаж байна” гэв.

Б.Лхам