Эрүүл мэндийн сайд Д.Сарангэрэл Улсын нэгдүгээр төв эмнэлгийн үйл ажиллагаатай танилцлаа.

Нэгдүгээр эмнэлэг шинэ төрлийн коронавирусын халдвар гарах эрсдэл өндөр байгаа энэ үед бэлтгэл ажлыг хангаж байгаа талаар хэлсэн юм. Тодруулбал, тус эмнэлэг энгийн 55 ор, эрчимт эмчилгээний 10 ор гаргажээ. Мөн эмнэлгийн ажилчдад байнгын сургалт явуулж байгаагаас гадна цаашид эмнэлгийн ажилчдын хамгаалах хувцас, багаж тоног төхөөрөмжийн дутагдалд орох эрсдэлтэй байгаа гэлээ.

Энэ үеэр Эрүүл мэндийн сайд Д.Сарангэрэл “ДЭМБ шинэ коронавирусын халдварын үед хэрхэн ажиллах талаар заавар тухай бүрт нь шинэчилж өгч байгаа. Учир нь халдварын нөхцөл байдал эрчимтэй өөрчлөгдөж байна. Энэ мэдээлэл өглөө, үүрээр, шөнө ирэх нь хамаагүй эмнэлгийн байгууллагын ажилчид тэр дор нь хөрвүүлэн олон нийтэд сэрэмжлүүлэн ажиллаж байна.

Түүнчлэн эрүүл мэндийн ажилтнуудын хувийн хамгаалах асуудал чухал байна. Тиймээс Засгийн газрын нөөц хөрөнгө болон бусад хандив тусламжаар авахаар болсон. Мөн тоног төхөөрөмжийн асуудлыг шат дараатай шийдвэрлэнэ” гэв.

Б.Лхам